"Ult taǵdyry" qozǵalysy 9 maýsymda ótetin kezekten tys prezident sailaýyna Ámirjan Qosanovty kandidat retinde usyndy. Bul sheshim qozǵalystyń 26 sáýirde Almatyda ótken jiynynda qabyldandy, dep habarlaidy "Ult aqparat"
«Búgin biz sailaýǵa qatysatynymyzdy jariialaimyz. Ekinshiden, úmitker retinde belgili saiasatker, 20 jyl boiy saiasatpen ainalysyp kele jatqan Ámirjan Qosanov «Ult taǵdyry» atynan sailaýǵa túsedi», - dedi «Ult taǵdyry» qozǵalysynyń jetekshisi, qoǵam qairatkeri Dos Kóshim.
Qosanov prezident bolsa "eldegi ekonomikalyq máselelerdi sheship, partiialardy tirkeý jolyn jeńildetetinin jáne parlament sailaýyna barlyq partiialardyń qatysýyna múmkindik jasaitynyn" aitty.
Sondai-aq, ol Ortalyq sailaý komissiiasy kandidatýrasyn tirkese, sailaýda negizgi qarsylasy "Nur Otan" partiiasynyń kandidaty Qasym-Jomart Toqaev bolatynyn málimdedi.
"Toqaevtyń ákimshilik resýrsy myqty. Biraq meniń artymda halyq tur. Teledebatqa da daiynmyn" dedi ol.
Qazaqstanda kezekten tys prezident sailaýy 9 maýsymda ótedi. Erte sailaýǵa kandidattar usyný 28 sáýirge deiin jalǵasady, kandidattardy tirkeý 11 mamyrda aiaqtalady.
Qazirge deiin saiasi partiialar men qoǵamdyq birlestikterden usynylǵan kandidattar:
- Sádibek Túgel - "Uly dala qyrandary" respýblikalyq qozǵalysy (til emtihanynan ótti);
- Qasym-Jomart Toqaev - "Nur Otan" partiiasy (til emtihanynan ótti);
- Amangeldi Taspihov - Qazaqstan kásipodaqtar federatsiiasy (OSK-ǵa qujattaryn tapsyrdy);
- Daniia Espaeva - "Aq jol" partiiasy;
- Tóleýtai Raqymbekov - "Aýyl" partiiasy;
- Jambyl Ahmetbekov - Qazaqstan kommýnistik halyq partiiasy.
Jalpyulttyq sotsial-demokratiialyq partiiasy sailaýǵa qatysýdan bas tartty.
Ámirjan Qosanov 1964 jyly Qyzylorda oblysy Sapaq aýylynda dúniege kelgen. Belgili saiasatker. Negizgi mamandyǵy jýrnalist. 1994-1997 jyldary Ákejan Qajygeldin basqarǵan úkimettiń baspasóz hatshysy boldy. 1998 jyly Qajygeldin basqarǵan Qazaqstan Halyq partiiasy tóraǵasynyń orynbasary, 2005 jyly Jalpyulttyq sotsial-demokratiialyq partiia tóraǵasynyń orynbasary qyzmetin atqardy.
2009 jyly JSDP men Azat partiialary qosyldy. Ol osy birigýge atsalysyp, partiia basshylyǵynda bolǵan tulǵanyń biri. Degenmen 2013 jyly partiia ishinde iritki bolyp, ol laýazymdy qyzmetinen bosady.
Al byltyr mamyr aiynda "Jańa Qazaqstan forýmy" qoǵamdyq uiymy quryldy. Oǵan "Ult taǵdyry", "Altynbek Sársenbaiuly qory", "Bolashaq" jastar qozǵalysy tárizdi birneshe qoǵamdyq uiym endi. Ámirjan Qosanov ta búginderi osy forýmnyń múshesi. Osylaisha oppozitsiialyq uiymdardan kóńili qalǵan saiasatker sońǵy kezderi ultshyldar qataryna kelip qosylǵan.
