Foto: diapazon.kz
14 jastaǵy mektep oqýshysy Nurjan Sydyqtyń qaza bolýyna qatysty is boiynsha oblystyq sot úkimdi ózgertti: buǵan deiin koloniiaǵa jiberilgen úsh sottalýshy bosatylyp, jazalary shartty jazaǵa aýystyryldy. Bul týraly Ult.kz «Diapazon» basylymyna silteme jasap habarlady.
Qaiǵyly oqiǵa 2024 jyldyń qyrkúieginde Qopa aýylynda bolǵan. Joǵary synyp oqýshylary toǵyzynshy synypta oqityn balalardy uryp-soqqan. Buǵan «úlkenderdi syilamaidy» degen jeleý túrtki bolǵan. Tóbelesten keiin Nurjan Sydyq oqiǵa ornynda kóz jumdy, onyń denesi aýyl shetindegi eski monshanyń mańynan tabylǵan.
Sotqa 17 jastaǵy alty jasóspirim tartyldy. 2025 jyldyń qazan aiynda birinshi satydaǵy sot úkim shyǵaryp, úsheýine buzaqylyq úshin bas bostandyǵyn shekteý jazasyn taǵaiyndasa, taǵy úsheýi buzaqylyq jáne abaisyzda ólimge ákep soqqan densaýlyqqa qasaqana aýyr ziian keltirý baptary boiynsha koloniiaǵa jiberilgen edi.
Naqty jazaǵa sottalǵandar da, jábirlenýshi tarap ta shaǵym túsirdi. Qylmystyq ister jónindegi sot alqasy isti qaita qarap, jazany jeńildetti: bas bostandyǵynan aiyrý jazasy shartty jazaǵa aýystyryldy. Sottalǵandar bostandyqqa shyqty, alaida belgilengen shekteýlermen baqylaýda bolady.
Oblystyq sottyń baspasóz qyzmeti sheshim qabyldaý kezinde kináni moiyndaý, ókinish bildirý, jábirlenýshilermen jasalǵan mediatsiialyq kelisim, sondai-aq qaza tapqan oqýshynyń týystarynyń jazany jeńildetýdi ózderi suraǵany eskerilgenin túsindirdi.
