«Úlken Eýraziia» mega-jobasy jan-jaqty zertteýdi qajet etedi. Bul týraly Eýraziialyq ekonomikalyq forýmynyń jalpy otyrysynda QR Prezidenti Qasym-Jomart Toqaev aitty, dep habarlaidy QazAqparat.
«Vladimir Vladimirovich Pýtin (Resei Federatsiiasynyń Prezidenti – avt.) óte qyzyq usynysty aityp, ony tiisti túrde tujyrymdap ótti. Bul turǵyda «Úlken Eýraziia» mega-jobasy eskerilip otyr. Shyn máninde, bul joba tyńǵylyqty zertteý men talqylaýǵa laiyq bolyp tur», - dedi Qasym-Jomart Toqaev.
Osy oraida Prezident aldaǵy ýaqytta bul usynysty júzege asyrýǵa qatysty talqylaý bolýy múmkin ekenin aitty.
«Sonymen qatar Resei Prezidenti tarapynan integratsiia protsesine basqa da múddeli elderdi qosý týraly oryndy usynysy aityldy. Bul rette Qytaidyń «Bir beldeý – bir jol» jobasy týraly, sondai-aq Eýraziia keńistigindegi integratsiia protsesterine qosylýǵa qyzyǵýshylyq tanytqan basqa elderdi de aita alamyz», - dedi Memleket basshysy.
Munymen qosa Qazaqstan Prezidenti qarjylyq máselelerge de toqtalyp ótti.
«Qarjylyq ózara qarym-qatynystarǵa bailanysty kúrdeli máselege qatysty toqtalsaq, bul taqyryp boiynsha jaqynda Vladimir Vladimirovich Pýtinmen tyńǵylyqty kelissózder boldy. Osy oraida tiisti ýaǵdastyqtarǵa kelip, Qazaqstan Úkimeti tarapynan qajet sharalar qabyldandy. Sondyqtan bul baǵyta problema joq dep sanaimyn. Bul jaǵdaida bir-birimen jaqyn ornalasqan Resei men Qazaqstan siiaqty memleketter tiisti sheshimderdi taba alady jáne aldaǵy ýaqytta da laiyqty sheshimdi jasaýy kerek», - dedi Qasym-Jomart Toqaev.
