Úleskerler qarjylandyrǵan árbir ekinshi páter jasyryn shemalar boiynsha satylady. Bul týraly Úkimet otyrysynda QR Básekelestikti qorǵaý jáne damytý agenttiginiń tóraǵasy Serik Jumanǵarin aitty, dep habarlaidy QazAqparat.
«Qurylys kezinde, úleskerlerdiń qarajatyn tartýǵa úsh tásildiń birimen ruqsat etiledi: Birinshi - qazaqstandyq turǵyn úi kompaniiasy biryńǵai operator kepildiginiń bolýy. Ekinshi – ekinshi deńgeidegi banktiń jobaǵa qatysý tásili kezinde ákimdik ruqsaty. Úshinshi - karkas turǵyzylǵannan keiin ákimdik ruqsaty. Qurylysty birinshi tásilmen uiymdastyrý kezinde bir qurylys salýshyǵa Biryńǵai operatordyń kepildik limiti 50 mlrd teńgeden aspaidy. Al iri qurylys salýshylardyń biriniń qurylys kólemi shamamen 250 mlrd teńgeni quraidy. Bul kózdelgen limitten 5 ese artyq. Ekinshi deńgeidegi banktermen nesielendirý boiynsha ekinshi tásil karkas turǵyzylǵannan keiin ǵana jumys isteidi Bul qurylys salýshylardyń óz qarajaty esebinen qurylystyń 30 paiyzyn quraidy. Osylaisha, agenttiktiń taldaý derekteri boiynsha, 2021 jyly jeke qurylys uiymdary salǵan 7,5 mln sharshy metr turǵyn úidiń 27 paiyzy óz qarajaty esebinen jáne 26 paiyzy zańnamada kózdelgen ruqsattardy alǵannan keiin salynǵan», - dedi ol.
Onyń dereginshe, turǵyn úidiń qalǵan 47 paiyzy brondaý, rezervteý jáne taǵy basqa sharttar boiynsha salynǵan.
«Osylaisha úleskerler qarjylandyrǵan árbir ekinshi páter jasyryn shemalar boiynsha satylady. Bul rette tekserý paraqtarynyń bolmaýyna bailanysty úleskerlerdiń qarajatyn ákimdikterdiń ruqsatsynsyz jappai tartý, jergilikti atqarýshy organdar tarapynan tiisti baqylaýsyz qalyp otyr. Prezidenttiń turǵyn úi jaǵdailaryn jaqsartýǵa arnalǵan zeinetaqy tólemderin paidalaný baǵdarlamasy úlestik turǵyn úi qurylysynyń úlken kóleńkeli ainalymy bar monopoliialanǵan naryǵy daiyn emes ekenin kórsetti. Sonymen 2,5 trln zeinetaqy qarajatynyń 68 paiyzy azamattyq-quqyqtyq mámileler boiynsha menshikti turǵyn úi satyp alýǵa, al 4 paiyzdan tómeni úlestik qurylys kelisimsharty boiynsha turǵyn úi satyp alýǵa baǵyttalǵan», - dedi Serik Jumanǵarin.
