Qazaqstan Qarýly kúshteri Bas shtabynyń bastyǵy UQShU Áskeri komitetiniń otyrysyna qatysty, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Máskeýde Ujymdyq qaýipsizdik týraly shart uiymyna (UQShU) múshe memleketteriniń áskeri yntymaqtastyǵyn damytý máseleleri boiynsha Áskeri komitettiń 18-shi otyrysy ótti. Otyrysqa Qazaqstan Respýblikasy Qarýly kúshteri Bas shtabynyń bastyǵy general-leitenant Murat Bektanov bastaǵan qazaqstandyq áskeri delegatsiia qatysty.
Otyrysqa qatysýshylar Shyǵys Eýropa, Kavkaz jáne Ortalyq Aziia aimaqtaryndaǵy áskeri-saiasi jaǵdaidy, UQShU ujymdyq qaýipsizdik júiesiniń kúshteri men quraldaryn basqarý jáne qalyptastyrý organdarynyń birlesken daiarlyq is-sharalaryn, UQShU daǵdarysqa den qoiý ortalyǵynyń qyzmetin jáne birlesken radiatsiialyq, himiialyq jáne biologiialyq qorǵanys, meditsinalyq qamtamasyz etý bólimshelerin qurýdy talqylady.
Odan basqa, 2021 jyly Uiymda tóraǵalyq etý kezeńinde Tájikstan Respýblikasynyń usynǵan áskeri saladaǵy Uiym qyzmetiniń basymdy baǵyttary tyńdaldy.
