Biyl kúzde Qazaqstanda Ujymdyq qaýipsizdik sharty uiymynyń aiasynda áskeri oqý jiynyn ótkizý josparlanyp otyr. Bul týraly Resei Federatsiiasynyń Prezidenti Vladimir Pýtin uiymnyń mereitoilyq sammitinde aitty, dep habarlaidy QazAqparat.
«Qazirgi kezeńde UQShU qyzmetin ári qarai jetildirý jáne onyń basshylyq qurylymdaryn ońtailandyrý máselesi - birinshi kezektegi mańyzdy sharýa ekeni tolyǵymen qisyndy. UQShU ujymdyq kúshterin zamanaýi qarýmen jáne tehnikamen jaraqtandyrý, jaýyngerlik kontingenttiń operativti sáikestigin ulǵaitý, bizdiń áskeri qurylymdar men arnaiy qyzmetterdiń birlesken áreketiniń úilesimdiligin jaqsartý máselelerimen de ainalysamyz. Tiisti máseleler turaqty negizde UQShU jelisi boiynsha ótetin áskeri oqý jiyndarynda pysyqtalyp otyrady. Ol oqý jiynyn biz ári qarai keńeitýge niettimiz», - dedi Resei Prezidenti.
Onyń aitýynsha, biyl kúzde atalǵan uiymǵa múshe úsh eldiń aýmaǵynda áskeri oqý jiyny ótedi.
«Biyl kúzde Qazaqstanda, Qyrǵyzstanda jáne Tájikstanda bizdiń uiymnyń oqý jiyndarynyń tutas seriiasyn ótkizý josparlanǵan. Bul sharalar memleketterimizdiń áskeri daiyndyǵy men áskeri qurylymdarynyń úilesimdiliginiń artýyna, jalpy bitimgerlik áleýettiń kúsheiýine múmkindik týǵyzatynyna senimdimin», - dedi Vladimir Pýtin.
Buǵan deiin Prezident Qasym-Jomart Toqaev Ujymdyq qaýipsizdik shartyna qol qoiylǵanyna 30 jyl jáne Uiymnyń qurylǵanyna 20 jyl tolýyna orai ótetin mereitoilyq sammitke qatysý úshin Máskeýge barǵany habarlanǵan edi.
2022 jyly Ujymdyq qaýipsizdik sharty uiymyna Armeniia Respýblikasy tóraǵalyq etip jatyr.
Jiyn barysynda UQShU-nyń damý bolashaǵy talqylanyp, uiymnyń mereitoiyna arnalǵan málimdeme qabyldandy.
Ujymdyq qaýipsizdik týraly shartqa (UQT) 1992 jylǵy 15 mamyrda Tashkentte qol qoiyldy.
2002 jylǵy 14 mamyrda Ujymdyq qaýipsizdik keńesiniń Máskeýde ótken sessiiasynda Ujymdyq qaýipsizdik týraly shartqa qatysýshy memleketter arasyndaǵy yntymaqtastyqtyń tetikteri men qurylymdaryn halyqaralyq aimaqtyq uiym – «Ujymdyq qaýipsizdik shart týraly uiymǵa» ózgertý, oǵan tiisti mártebe berý týraly sheshim qabyldady. 2003 jylǵy 18 qyrkúiekte UQShU Jarǵysy óz kúshine endi.
Ujymdyq qaýipsizdik shart uiymyna Armeniia, Belarýs, Qazaqstan, Qyrǵyzstan, Resei, Tájikstan kiredi.
