.png)
Foto: Svetlana Lobodanyń jeke muraǵatynan
Svetlana Loboda Resei shoý-biznesinde oiyp turyp oryn alǵan tegi ýkrainalyq ánshi edi. Resei Ýkrainaǵa soǵys ashqasyn ol bul elmen bailanysyn tolyǵymen úzgen. Svetlana birshama ýaqyt shyǵarmashylyqtan úzilis alyp, keiin ýkrain jáne aǵylshyn tilderinde ánder shyǵara bastady. Sondai-aq, ol soǵysta qiraǵan Kiev oblysyndaǵy týǵan qalasy Irpendi qalpyna keltirýge qarajat bólip, qaiyrymdylyqpen ainalysty, dep habarlaidy Ult.kz.Qazir Svetlana Loboda óz tyńdarmandaryn qýantyp, jańa ánder jazyp, gostroldik saparlarǵa shyǵyp, kontsert berip turady. Jaqynda Svetlananyń "Liýbov do kontsa sveta" degen jańa áni shyqty.
Oraiy týyp, Svetlana Loboda ULT.KZ tilshisine shyǵarmashylyǵy men Qazaqstan týraly pikirin aityp, suhbat berdi.
Svetlana Sergeevna, siz ózińizdiń týǵan kúnińizde "Liýbov do kontsa sveta" dep atalatyn jańa kúzgi hitińizben tanystyrdyńyz. Aityńyzshy, qazir siz úshin kim nemese ne "jaryq dúnieniń sońyna deiin mahabbat" jáne án kimge arnalady?
Mahabbat mindetti túrde belgili bir adam týraly emes, bul ishki kúi dep aitar edim. Ol sizdiń ishińizge kirip, boiyńyzǵa taraityn sezim.
“Liýbov do kontsa sveta” dep atalatyn kúzgi singl ómirde bolatyn kez kelgen jaǵdaidan myqtyraq sezim týraly. Ol - bútkil álem kóz aldymyzda qirap jatqanda bizben birge qalatyn sezim. Ol bizdi alǵa jeteleitin energiia siiaqty nemese barlyǵy joq bolyp ketkende qalatyn syǵyraiǵan jaryq sáýlesi ispettes... kúres pen aýyrtpashylyq jáne bul ómirde barlyǵy saǵan qarsy siiaqty kóringende ishińnen tabylatyn kúsh týraly. Bul án dál men sipattap otyrǵandai mahabbat jaiynda — eshqandai talapsyz, sońyna deiin... Meniń oiymsha, ásirese bizdiń dáýirimizde muny seziný óte mańyzdy.
Foto: Svetlana Lobodanyń jeke muraǵatynan
«Meniń jańa nusqam – ózimniń jáne álem aldyndaǵy adaldyq týraly»
«Ár ártistiń ómirinde ósýi úshin óziniń jańa nusqasyn álemge tanystyrýy qajet bolatyn sát týyndaidy. Qazir meniń shyǵarmashylyǵymda dál osy kezeń» -dep jazypsyz instagram paraqshańyzda. Sizdiń jańa nusqańyz qandai? Biz soǵys adamnyń bolmysyna áser etetinin bilemiz, biraq ol sizdiń sanańyzǵa qalai áser etti jáne shyǵarmashylyq mansabyńyzdy jalǵastyrýǵa kúsh-qairatty qaidan aldyńyz?
Adamǵa kúsh-qairat syrttan kelmeidi. Ol sizdi syndyrýy kerek siiaqty kórinetin, biraq syndyra almaityn jaǵdaimen betpe-bet kelgen kezde paida bolady. Osyndai sátterde ózińniń shynaiy júretin jolyńdy naqty túsinesiń. Tipti ainalańnyń bári qara túnek siiaqty kórinse de, sen ary qaratai júre beresiń, sebebi basqasha jasai almaisyń. Meniń jańa nusqam – ózimniń jáne álem aldyndaǵy adaldyq týraly. Meniń kúshim – otbasym, jaqyndarym, sosyn árine jankúierlerim.
Foto: Svetlana Lobodanyń jeke muraǵatynan
«Til – myqty qural»
Soǵysqa deiin ýkrainalyqtardyń kóbi oryssha sóileitin, qazir ýkrain tilinde sóileidi. Ýkraina halqyna jáne siz úshin ana tiliniń qundylyǵy qandai?
Bul ulttyq biregeiliktiń óte mańyzdy atribýty ekeni sózsiz. Ýkraina halqy úshin ana tili saýyt pen qylysh siiaqty. Ýkrain tilin bilemin jáne óte qatty jaqsy kóremin, ol tilde óz komandamnyń abyroiy úshin sóileimin.
Qazaqstanda da basqa burynǵy Sovet Úkimetiniń quramynda bolǵan elder siiaqty orys tilinde kóp sóileidi. Tildiń esh jazyǵy joq, álemdegi ár til ózinshe erekshe, ózinshe sulý. Biraq keide bizde qazaq tilinde, iaǵni memlekettik tilde sóileitinderdi keleke etip jatady. Mysaly jaqynda Qazaqstan fýtbol federatsiiasynyń bas bapkeri Cherchesov degen azamat qazaq tilinde suraq qoiǵan jýrnalisti keleke etti. Bul qoǵamda úlken daý týdyryp, oǵan aiyppul salyndy. Mundai jaǵdaidy qalai baǵalar edińiz?
Bireýdi ana tilinde sóilegeni úshin keleke etý – adamnyń tulǵalyq ereksheligin joqqa shyǵarýmen teń. Bul jerde másele til kináli me, joq pa degen suraqta emes, biz ony qalai qabyldaitynymyzda. Til – myqty qural. Ol ne adamdardy biriktiredi, ne bolmasa alshaqtatady. Eger bireý basqa adamnyń týǵan tilin keleke etse, bul til týraly emes. Ol adamnyń shynaiy qundylyǵyn túsinýde qanshalyqty alystaǵanyn kórsetedi.
Siz Qazaqstanǵa jii keletinińizdi bilemiz. Sizge bizdiń el unai ma jáne siz úshin Qazaqstannyń ereksheligi nede?
Men úshin Qazaqstan rasymen de erekshe memleket jáne bul osynda jii bolatyndyǵymnan emes. Munda ár kelgen saiyn jylýlyq pen qýanysh jáne sózben aityp jetkize almaityn ǵajaiyp energiia sezinemin. Bul elde kúsh pen tereńdik bar, sonymen qatar eldiń keremet qonaqjailyǵyn sezinesiń. Bizdiń dástúrimiz ben mádenietimiz uqsamasa da, Qazaqstanda men ózimdi árqashan úidegidei sezinemin. Biraq bir uqsastyq bar: ol – óz tarihyń men shyqqan tegińe qurmet. Ótkeniń men bolashaǵyńnyń arasynda balans ustaý - bul sirek kezdesetin artyqshylyq.
Qazaqstanda úlken týr-kontsert uiymdastyrý josparyńyzda joq pa?
Mindetti túrde bolatynyna senemin. Jańalyqtardy baqylap otyryńyzdar!
Suhbatyńyzǵa rahmet!
Aita keteiik, suhbat 2024 jyly 18 qazanda alyndy. Qazir Svetlana Loboda Qazaqstanda úlken gastroldik týrmen aimaqtardy aralap júr. Ol qazaqstandyq ánshilermen birlesip án shyrqap, turǵyndardyń úiine qonaqqa baryp, qazaqtyń ulttyq taǵamynan dám tatyp júrgenin óziniń áleýmettik jelidegi paraqshasynda bólisip jatyr.
Suhbattasqan: Baljan Jeńisqyzy
