Ýkrainanyń Harkov qalasynan qazaqstandyq 40 stýdentti evakýatsiialaý jumysy júrip jatyr. Bul týraly Qazaqstannyń Ýkrainadaǵy elshisi Darhan Káletaev málim etti, dep habarlaidy QazAqparat.
«Harkovten qazaqstandyq 40 stýdent habarlasty. Onda ne bolyp jatqanyn bilesiz be? Naǵyz atys-shabys. Stýdentter maǵan habarlasyp, atys júrip, bomba jarylyp jatyr, qorqynyshty deidi. Olardy qutqarýdyń 2 amaly boldy. Biri - sondaǵy konsýldyqtyń jertólesinde ustai turý, ekinshi joly - Harkovten Lvovqa poezben jetkizý. Biz ekinshi joldy tańdadyq, qazir stýdentter vokzalda. Jáne Sýmy qalasynda 2 azamatymyz bar», - dedi Darhan Káletaev.
Sondai-aq, elshi azamattardy evakýatsiialaýda kólik baǵasynyń ósip ketkenin aitty.
«Kievten Polsha shekarasyna jetkizý úshin 15-20 myń dollar suraidy. Bizde elshilikte ondai kólemdegi qarajat joq. Onyń ústine qarjy aýdarylymdary jumys istemeidi», - deidi ol.
