"Evrovidenie" mýzykalyq baiqaýynyń biylǵy jeńimpazy, Ýkrainanyń Kalush Orchestra toby ózderine berilgen "hrýstal mikrofondy" aýktsionǵa shyǵaryp, 900 myń dollarǵa satty.
Aýktsion YouTube arnasynda tikelei efirden kórsetildi. Aktsiiany telejúrgizýshi Sergei Pritýlanyń qaiyrymdylyq qory uiymdastyrdy. Qarjy Ýkraina kriptovaliýta birjasyndaǵy kriptovaliýtalardyń birimen esepteldi, dep habarlaidy Bi-bi-sidiń Orys redaktsiiasy.
Sergei Pritýla buǵan deiingi sózinde jinalǵan aqshaǵa uiymdastyrýshylardyń Ýkraina qarýly kúshterine ushqyshsyz basqarylatyn PD-2 apparatyn satyp alǵysy keletinin aitqan.
Jeksenbi kúni Berlinniń Brandenbýrg qaqpasynyń aldynda "Save Ukraine — #StopWar" ("Ýkrainanyn qutqaryńdar — soǵysty toqtatyńdar") degen qaiyrymdylyq shoýy ótip, oǵan álemniń estrada juldyzdary, Ýkrainanyń Kalush Orchestra toby da qatysqan. Jinalǵan aqsha soǵysta jaralanǵandar emdelip jatqan Ýkrainanyń 12 oblysyndaǵy aýrýhanalarǵa kómekke berilgen.
Litva halqy bes kún ishinde Ýkraina áskerine Túrkiianyń "Bairaktar" apparatyn satyp alý úshin 5 million dollar jinaǵan. Bul aqparatty Litva qorǵanys ministri Arvidas Anýshaýskas rastaǵan.
