Ýkrainadaǵy soǵysta Reseidiń Krasnoiar ólkesi Astrahan oblysynyń týmasy Arman Narynbaev qaza bolǵan. Bul jóninde ólke gýbernatory Igor Babýshkin Instagram paraqshasynda habarlady, dep jazady Azattyq.
Bul - tómengi Edil boiyn mekendegen halyq arasynda soǵysta qaza bolǵany resmi túrde rastalǵan alǵashqy málimet. Buǵan deiin jergilikti chattar men áleýmettik jelilerde Astrahan jaqtan barǵan soldattardyń qaza bolǵany jaily málimetter taraǵan. Volodar aýdany (Astrahan oblysyndaǵy eldi meken - red.) turǵyndarynyń biriniń sózinshe, bul jaqqa 6 múrde jiberilgen. Astrahan oblysynda negizinen qazaqtar turady.
Azattyqtyń Orys qyzmetiniń tilshisi Todar Baqtemir Twitter'de soǵysta taǵy birneshe qazaq qaza bolýy múmkin ekenin, ázirge resmi túrde rastalmaǵanyn jazdy. Onyń aitýynsha, aqparattyń resmi túrde rastalmaýyna Narynbaevtyń ofitser bolǵany, al qaza bolǵan ózge qazaqtardyń "áskeri salada tájiribesi joq, Ýkrainaǵa zańsyz jiberilgeni" sebep bolýy múmkin.
"Qaza bolǵan soldattardyń týystary qysymǵa ushyraǵan, sóileýden qorqady" dep jazdy jýrnalist.
Idelreal.org saitynyń jazýynsha, Tatarstandaǵy ata-analar da Ýkrainamen shekarada júrgen balalarynyń taǵdyryna alańdaidy. Resei áskeriniń baǵytyn baqylaǵan SIT toby áskeri qyzmetkerlerdiń saqtyq maqsatynda (jaǵdai ýshyǵyp, úlken soǵysqa ainalyp ketse) shekarada júrgenin rastaǵan.
