Ýkrainadaǵy Qazaqstan azamattaryn Polsha arqyly elge aldyrý úshin 3 reis uiymdastyrylady, dep habarlaidy QazAqparat.
Bul týraly Azamattyq aviatsiia komiteti málim etti.
«Ýkrainadaǵy ahýal «qaýipsizdiktiń joǵary táýekeli bar» dep baǵalanǵanyna jáne Ýkraina áýe keńistiginiń jabylýyna bailanysty, «Eir Astana» áýe kompaniiasy 2022 jylǵy 24 aqpannan 7 naýryzǵa deiin Ýkrainaǵa qatynaityn barlyq turaqty reisterdi toqtatty. Buǵan deiin «Eir Astana» Qazaqstan men Ýkraina arasynda jolaýshylar tasymalyn Almaty – Kiev (aptasyna 3 reis), Nur-Sultan – Kiev (aptasyna 1 reis) baǵyttary boiynsha atqaratyn. Qazaqstan azamattaryn elge ákelý úshin QR Indýstriia jáne infraqurylymdyq damý ministrligi QR Syrtqy ister ministrligimen, QR Ýkraina men Polshadaǵy Elshilikterimen, sondai-aq «Eir Astana» áýe kompaniiasymen birlesip, Katovitse (Polsha) - Atyraý baǵyty boiynsha repatriatsiialyq reisterdi uiymdastyrý máselesin pysyqtady. QR Syrtqy ister ministrliginiń aqparaty boiynsha, repatriatsiialyq reisterdi uiymdastyrýǵa arnalǵan shyǵyndar memleket esebinen óteledi», - dep jazylǵan «Eir Astana» AQ baspasóz qyzmeti málimetinde.
«Eir Astana» osy kelisim aiasynda A-321 úlgisindegi, syiymdylyǵy 179 oryndyq áýe kemesimen 3 reis oryndaýdy josparlap otyr. Olar:
1) 28 aqpan Polsha ýaqytymen: Atyraý (08:45) – Katovitse (09:00/10:30) – Atyraý (19:20);
Al Nur-Sultan ýaqytymen: Atyraý (09:45) – Katovitse (14:00/15:30) – Atyraý (20:20).
2) 28 aqpan Polsha ýaqytymen: Atyraý (14:00) – Katovitse (14:20/16:00) – Atyraý (00:20+1), jergilikti ýaqyt.
Al Nur-Sultan ýaqytymen: Atyraý (15:00) – Katovitse (19:00/20:30) – Atyraý (21:20), ýaqyty Nur-sultan qalasy.
«Úshinshi reistiń kestesi qosymsha habarlanady. QR Polshadaǵy konsýlynyń aqparatyne súiensek, 28 aqpan kúni saǵat 08:00-degi jaǵdai boiynsha Katovitse qalasynda Qazaqstannyń 80 azamaty (49 jolaýshy jáne QR Ýkrainadaǵy Elshiliginiń 31 qyzmetkeri) bar. Sondai-aq, búgin 116 qazaqstandyq azamat Ýkraina-Polsha shekarasynan ótip, qazirgi ýaqytta Katovitse áýejaiyna bet aldy. QR azamattarynyń Katovitse qalasyna kelý ýaqyty jergilikti ýaqyt boiynsha saǵat shamamen 07:00 dep belgilengen», - delingen «Eir Astana» usynǵan aqparatta.
Qazaqstan Respýblikasynyń Polshadaǵy konsýlynyń áýe kompaniiasyna bergen aqparaty boiynsha, 1-shi reispen QR azamattaryn (116+49 adam) tasymaldaý josparlanýda. QR Ýkrainadaǵy Elshiliginiń qyzmetkerleri (31 adam) 2-shi reispen ushýdy josparlap otyr.
«Sonymen qatar, mynadai problemalar bar:
1) avtomobilderdiń kóp jinalýyna bailanysty Kiev qalasynan shyǵý qiyn;
2) Ýkraina men Polsha shekarasynda adamdardyń nómiri qalyń (shekaradan Katovitsege deiingi qashyqtyq shamamen 400 shaqyrym)», - dep jazylǵan málimette.
