Resei-Ýkraina soǵysynda ýkrain áskeri sapynda soǵysyp jatqan qazaqstandyq sarbaz Jasulan Dúisembin Vladimir Zelenskiiden kómek surady, dep habarlaidy Ulysmedia.kz.
Ýkraina prezidentine joldaǵan beineúndeýinde ol byltyr qyrkúiek aiynda kelisimshart boiynsha Ýkrainanyń qarýly kúshteriniń qataryna qabyldanǵanyn, soǵysqa deiin aldyńǵy shetpe áskeri boryshyn ótegenin, al soǵys bastalǵanda qolyna qarý alyp, Reseige qarsy shaiqastarǵa qatysyp kele jatqanyn aitty.
Soǵys bastalysymen batyr qala Volnovahany azat etýge qatystym. Volnovaha baǵytynda qorǵanys shebin myqty ustap soǵystym. Osy ýaqytta Ýkrainanyń azamattyǵyn alýǵa tyrysqan edim. Óitkeni Qazaqstanda meni qylmystyq jaýapkershilikke tartady, kem degende 9 jylǵa sottalýym múmkin. Meni ustaý úshin qolda bar jaǵdaidyń bárin jasap jatyr. Al men Ýkrainanyń bostandyǵy, azattyǵy men ádildik úshin shaiqastarǵa qatysyp jatyrmyn. Meniń zaiybym – Ýkrainanyń azamaty. Osy jerde eki balamyz týǵan. Maǵan kóp adam kómektesemiz degen. Alaida, eshkim eshnárse istei almai otyr. Men zańdy turǵyda qorǵalǵym keledi. Biraq bári bos sóz kúiinde qalyp otyr. Osy kezge deiin bir aýyz sóz aityp, Ýkrainadaǵy soǵysqa qarsy shyqqan reseilikterdiń azamattyq alǵanyn estigen edim. Al Ýkraina úshin ómirine qaýip-qater tóndirip, soǵysyp jatqan adamdar azamattyq turmaq, áskeri bilet te ala almai jatyr. Sondyqtan men sizden basqynshylarǵa qarsy soǵysý úshin azamattyq alýǵa kómektesýińizdi suraimyn, - dedi Dúisembin.
Eske sala keteiik, budan buryn Ulttyq qaýipsizdik komitetiniń Nur-Sultan qalasy boiynsha departamenti Ýkrainada soǵysyp jatqan qazaqstandyqqa qatysty sotqa deiingi tergeýdi bastaǵanyn habarlaǵanbyz.
Sotqa deiingi tergeý Qylmystyq kodekstiń 172-baby (jaldanýshylyq belgileri bolmaǵan jaǵdaida Qazaqstan Respýblikasy azamatynyń shet memleket aýmaǵynda qarýly qaqtyǵysqa nemese soǵys qimyldaryna qasaqana zańsyz qatysýy) boiynsha júrgiziledi. Bul bap qylmyskerge 5 jyldan 9 jylǵa deiingi merzimge bas bostandyǵynan aiyrý jazasyn berýdi kózdeidi.
