Qazaqstan azamattary mingen 4 avtobýs Ýkraina shekarasynda tur. Bul týraly Qazaqstannyń Ýkrainadaǵy elshisi Darhan Káletaev málim etti, dep habarlaidy QazAqparat.
«Áskeri áreketter ýshyǵyp bara jatyr, jolda keptelis. Erteń Ýkraina-Polsha shekarasyndaǵy bosqyndardyń sany millionǵa jetpek. Shekaradaǵy jaǵdaiǵa kelsek, qazir bizdiń 4 avtobýs kepteliste tur. Ár avtobýsta 40-50 qazaqstandyq bar. Azamattarymyz mingen birinshi avtobýs Polshaǵa jetti, úlken avtobýs bolǵandyqtan onda 80 adam boldy», - dedi Darhan Káletaev.
Onyń aitýynsha, qazaqstandyqtar mingen 2 avtobýs shekaraǵa taiap qaldy.
«Lvov qalasynan Kievke taǵy 2 avtobýs otandastarymyz jetkizildi. Olar shekara kezeginde tur. Diplomatiialyq baǵyt boiynsha tek diplomatiialyq kólikterdi ǵana jiberip jatyr. Politseilerdiń qaraýyldaýymen qazaqstandyq diplomatiialyq missiianyń 8 avtokóligi óte aldy. Al qazaqstandyqtar mingen avtobýstardy birge alyp shyǵý múmkin emes. Sebebi diplomatiialyq emes kólikterdi qatań tekserip baryp jiberedi. Biz qazaqstandyqtardy shekaraǵa jetkizý úshin nómiri ýkraindyq avtobýstardy jaldadyq, olardy diplomatiialyq baǵyt boiynsha shyǵarmaidy. Biz sonda elshilik qyzmetkerleriniń otbasyn Ýkrainada qaldyryp ketýimiz kerek pe?» - deidi ol.
Elshiniń málimetinshe, Ýkrainadan diplomatiialyq baǵyt arqyly shyqqan kóliktiń ishinde 25 elshilik qyzmetkerleri otbasynyń 25 múshesi jáne 40 el azamaty bolǵan.
