© Photo : Pixabay / tomekwalecki
Ýkrainanyń eki qalasynda alaiaqtardyń transulttyq qylmystyq toby ustaldy, dep habarlaidy Polisia.kz.
Qazaqstannyń kiberqylmysqa qarsy is-qimyl departamentiniń qyzmetkerleri Ýkrainanyń ulttyq politsiiasy men prokýratýrasymen birlesip, Chernovtsy men Odessa qalalarynda alaiaqtardyń transulttyq qylmystyq tobyn quryqtady. Sol jerde qazaqstandyqtardy uzaq ýaqyt boiy aldaýmen ainalysqan alaiaqtyq call-ortalyq joiyldy.
Qylmyskerler jábirlenýshilerge Qazaqstannyń ulttyq banki, quqyq qorǵaý organdary men arnaiy qyzmetteri atynan qońyraý shalyp, "kúdikti operatsiialar" men "terroristik uiymdardy qarjylandyrý" úshin qylmystyq jaýapkershilikke tartamyz dep qorqytqan. Osylaisha, azamattardy nesie alýǵa, múlkin satýǵa jáne depozittegi qarajatty droptardyń shotyna aýdarýǵa májbúrlegen.
Kúdiktilerdiń turǵylyqty mekenjailary men sall-ortalyqty tintý kezinde 30-dan astam kompiýterlik tehnika, 79 uialy telefon, sim-kartalar, quqyq qorǵaý jáne arnaiy organdardyń, ulttyq bank qyzmetkerleriniń jalǵan kýálikteri, azamattardy aldaýǵa arnalǵan túrli jaýap nusqalary bar aldyn ala daiyndalǵan stsenariiler, sondai-aq basqa da aiǵaqtar tárkilendi.
"Qylmystyq topta ákimshiler, HR-menedjerler, "kloýzerler", tehnikalyq qyzmetkerler, tipti "kúshtik blok" bolǵan. Al aldanǵan azamattardan túsken aqsha call-ortalyqtyń jumysyna, avtokólik satyp alýǵa jáne taǵy da basqa nárselerge jumsaldy. Keńseni ustaýǵa ǵana aiyna 60 myń AQSh dollar qajet bolǵan. Kúdiktilerdiń bireýi sońǵy alty aida bes kólik satyp alǵan", - deidi kiberqylmysqa qarsy is-qimyl departamenti bastyǵynyń orynbasary Aslan Óskembaev.
Aldyn ala málimetke sáikes, qylmystyq top Qazaqstan azamattaryn 900 million teńgeden astam somaǵa aldaǵan. Arnaiy operatsiia kezinde Ýkrainanyń 9 azamaty ustalyp, onyń beseýi qamaýǵa alyndy.
