Ýkrainada qalyp qoiǵan 50 aýyr júk kóliginiń júrgizýshisi ózderiniń ornalasqan jerý týraly málimet berdi, dep habarlaidy QazAqparat «Atameken» ulttyq kásipkerler palatasyna silteme jasap.
«Qazirdiń ózinde 50 aýyr júk kóliginiń júrgizýshisi Ýkrainadaǵy óziniń ornalasqan jeri týraly habarlady. Olardyń kópshiligi júk tielgen kólikterin tastap, elden ushyp kete almaidy. 25 aqpanda Atameken UKP syrtqy ister, saýda ministrlikterine jáne indýstriia jáne infraqurylymdyq damý ministrligine reseilik, belarýstyq, ýkraindyq, polshalyq jáne basqa da taraptardan qazaqstandyq tasymaldaýshylardyń Ýkraina aýmaǵynan shyǵýy úshin «jasyl dálizdi» qamtamasyz etý týraly máseleni pysyqtaý ótinishimen hat joldady», - dep jazylǵan «Atameken» ulttyq kásipkerler palatasynyń Telegram paraqshasynda.
Sondai-aq, Ýkrainada qalyp qoiǵan kólik júrgizýshilerine habarlandyrý jariialandy.
«Biz júrgizýshiler týraly málimetterdi jinaýdy jalǵastyramyz jáne olardy jedel túrde vedomstvolarǵa joldaimyz. Eger siz nemese sizdiń kompaniiańyzdyń júrgizýshisi Ýkrainadan shyǵa almai qalsa, jeke derekterdi +7 778-870-1432 (UKP call-ortalyǵy) nómirine jiberýge bolady», - dep habarlaidy «Atameken» ulttyq kásipkerler palatasy.
