Ýkrainada Zaporoje oblysynyń memlekettik ákimshiligi Resei áskeri Zaporoje atom elektr stantsiiasynyń aýmaǵyn basyp alǵanyn habarlady. Túnde Resei soldattary nysandy atqylap, sonyń saldarynan stantsiia órtengen. Jergilikti biliktiń habarlaýynsha, órt sóndirilgen, "jedel ókil energobloktardyń jaǵdaiyn baqylap otyr".
Zaporoje oblystyq áskeri ákimshiliginiń tóraǵasy Aleksandr Starýh 4 naýryzda radiatsiia deńgeii oblys aýmaǵynda ózgermegenin, halyq densaýlyǵyna qater joǵyn málimdedi. Ol Facebook jelisinde Zaporoje oblystyq aýrýdy baqylaý jáne aldyn alý ortalyǵy aýmaqta tekseris júrgizgenin habarlady.
Juma kúni sál erterek Ýkraina tótenshe jaǵdai memlekettik qyzmeti Energodar mańyndaǵy Zaporoje atom elektr stantsiiasy aýmaǵynda órttiń sóndirilgenin habarlaǵan. Zardap shekkender joq.
Zaporoje oblysy Energodar qalasy Kahov sý qoimasynyń jaǵalaýynda ornalasqan atom elektr stantsiiasy - Eýropadaǵy eń iri stantsiialardyń biri, Ýkraina tutynatyn elektr energiiasynyń besten bir bóligi osy nysanda óndiriledi.
Atom energiiasy jónindegi halyqaralyq agenttik (MAGATE) 4 naýryzda tótenshe oqiǵalar men apatty jaǵdai jónindegi ortalyǵyn táýlik boiy úzdiksiz jumys isteitin rejimge kóshiretinin habarlaǵan.
