Ýkraina shyǵysyndaǵy qaqtyǵys aimaǵynda jańa jyl merekesine orai ýaqytsha bitim jasaldy. 29 jeltoqsannan bastap atys toqtatylady. Bul jóninde janjaldy retteý jónindegi úshjaqty bailanys tobyna qatysýshylar málimdedi.
Ýkraina ókili Evgenii Marchýk úkimet bitimdi paidalanyp, zalal kelgen ǵimarattardy jóndeitinin málimdedi. Moiyndalmaǵan Lýgansk halyq respýblikasynyń ókili Andrei Marochko da bitim shartyn oryndaýǵa ýáde berdi. Bailanys tobyndaǵy Resei ókili Boris Gryzlov Máskeý oq atýdy toqtatý shartyn buzǵandardy jaýapqa tartýdy talap etetinin aitty.
Byltyr Donbassta 23 jeltoqsanda bitim jasalǵan. Biraq 2018 jyly Reseimen shektesetin aimaqta áskeri jaǵdai qaita shielenisken. Buǵan Kerch buǵazyndaǵy oqiǵa sebep boldy. Qarasha aiynyń 25-i kúni Resei shekarashylary Ýkrainanyń úsh áskeri kemesine oq atyp, teńizshilerimen birge ustaǵan. Qarashanyń 28-i kúni Ýkrainanyń Reseimen shektes oblystarynda bir aiǵa áskeri jaǵdai jariialanyp, 26 jeltoqsanda onyń kúshi joiylǵan.
Ýkraina shyǵysynda 2014 jyly kóktemde reseishil separatister men úkimet áskeri arasynda bastalǵan qaqtyǵystardan jalpy 10 myńnan astam adam qurban bolyp, júzdegen myń adam úiin tastap ketýge májbúr boldy.
