Ýkraina men Resei ókilderi Pripiattegi kelissózderdiń alǵashqy raýndynan keiin óz elderiniń astanalaryna qaitatyn boldy. Kelissózde aitylǵan sharttardy sol jaqta pysyqtap, qaita jolyǵatyn bolyp ýaǵdalasty. BELTA agenttigi Ýkraina Prezidenti Keńsesi Basshysynyń keńesshisi Mihail Podoliaktiń jýrnalisterge bergen málimetine súienip osyndai aqparat taratty, dep habarlaidy QazAqparat.
«Búgin Ýkraina men Resei delegatsiiasy kelissózderdiń birinshi raýndyn ótkizdi. Onyń negizgi maqsaty Ýkrainadaǵy atysty toqtatý jáne soǵys qimyldaryn talqylaý boldy. Taraptar belgili bir sheshimder belgilengen birqatar basym taqyryptardy anyqtady. Sol sheshimder boiynsha qandai da bir konsýltatsiialar alý úshin qos taraptyń ókilderi óz elderiniń astanalaryna qaitady. Sondai-aq, qos tarap kelissózdiń ekinshi raýndyn ótkizý múmkindigin talqylady. Sol kezdesýde búgingi kelissózde aitylǵan máseleler boiynsha naqty praktikalayq sheshimder qabyldanýy múmkin», - dedi Mihail Podoliak.
Al Resei delegatsiiasynyń jetekshisi, RF Prezidentiniń kómekshisi Vladimir Medinskiidiń sózinshe, eki eldiń ókilderi talqylanatyn máseleler boiynsha negizgi baǵyttardy anyqtaǵan.
«Biz ortaq ustanymdardy boljaýǵa múmkindik beretin keibir núktelerdi taptyq», - dedi Resei tarapynyń ókili. Onyń aitýynsha, taraptardyń kelesi kezdesýi Belarýs-Polsha shekarasynda ótedi.
«Resei men Ýkraina Belarýstegi kelissózde birin-biri tyńdady», - dedi jýrnalisterge Resei Federatsiiiasy delegatsiiasynyń múshesi, RF Memlekettik Dýmasynyń Halyqaralyq ister jónindegi komitetiniń tóraǵasy Leonid Slýtskii.
Onyń sózine qaraǵanda, kelissózder barysynda atysty toqtatý jáne demilitarizatsiia máseleleri talqylanǵan.
