Ýkraina parlamenti – joǵarǵy rada depýtattary Reseide shyǵarylǵan koronavirýsqa qarsy vaktsinalarǵa tyiym salý týraly zań jobasyn kópshilik daýyspen maquldady. Buǵan qosa joǵarǵy rada AQSh, Eýropa odaǵy, Qytai, Úndistan jáne Meksikada shyǵarylǵan vaktsinalardy jedeldetip tirkeý protsedýrasyn jeńildetti.
Ýkraina halyqqa koronavirýs vaktsinasyn salý naýqanyn áli bastaǵan joq.
Úkimet aqpanda amerikalyq Pfizer jáne germaniialyq BioNTech birlesip jasaǵan vaktsinanyń 100-200 myń dozasyn alýdy josparlap otyrǵanyn habarlady.
El ókimeti Reseide jasalǵan vaktsinany qoldanbaitynyn buǵan deiin de aitqan. "Resei vaktsinasyn Ýkrainada eshkim tirkemeidi" dedi Ýkraina densaýlyq saqtaý ministri Maksim Stepanov 29 qańtarda ótken arnaiy brifingte.
2014 jyly Resei Ýkrainanyń Qyrym túbegin zańsyz annesiialaǵaly beri Kiev pen Máskeý arasy nasharlap ketti. Onyń ústine Ýkraina shyǵysyndaǵy separatisterdi Resei qoldap otyr dep sanaidy. Donbass aimaǵyndaǵy qarýly qaqtyǵys saldarynan osy kúnge deiin 14 myńnan astam adam qaza tapqan.
Sońǵy eki apta elde koronavirýs juqtyrǵan, aýrýhana jatqyzylǵan jáne bul dertten kóz jumǵan adamdar sany birtindep azaiyp keledi. Byltyrǵy naýryzdan beri Ýkrainada Covid-ke shaldyqqan 1,2 mln adam tirkelgen, 22 myń adam kóz jumǵan.
