NATO-ǵa umtylyp jatqan Ýkraina bul baǵytta ilgerileýshiliktiń joqtyǵyna narazy. 26 mamyrda Kiev NATO-nyń "ashyq esik" saiasatynyń Ýkrainaǵa kelgende nátijesiz shyǵyp jatqanyn alǵa tartyp, áskeri bloktyń kelesi aida ótetin sammitine Ýkrainanyń shaqyrylmaǵanyna narazylyq bildirdi. Reseimen jaǵdai ýshyqqan tusta NATO ókilderi 14 maýsymda Briýsselde kezdesip, AQSh prezidenti Djo Baiden jetekshiligindegi transatlantikalyq odaq arasyndaǵy qatynasty nyǵaitý máselesin talqylaidy.
“Odaqtastardyń jabyq sammit ótkizýge degen qulshynysyn túsinemiz... Biraq Ýkrainany oǵan ne úshin shaqyrmaǵany túsiniksiz” dedi Ýkraina syrtqy ister ministri Dmitrii Kýleba.
Prezident Vladimir Zelenskii osy aidyń basynda NATO-dan Qara teńizdegi yqpalyn kúsheitip, Vashingtonnan aldaǵy sammitte Kievtiń NATO-ǵa múshe bolý boiynsha usynǵan josparyn qoldaýdy suraǵan.
Resei 100 myńnan astam áskerin Ýkrainamen shekaraǵa jáne Qyrymǵa shoǵyrlanǵandyrǵannan keiin Zelenskii áskeri odaqqa osyndai úndeý jasap otyr. 2014 jylǵy Qyrym anneksiiasy men Ýkraina shyǵysynda soǵys bastalǵaly beri shekara mańyna jáne túbekke osynshalyqty kóp ásker ornalaspaǵan.
Ýkraina shyǵysynda Kreml dem beretin separatister men ýkrain áskeri arasynda qaqtyǵys tynshymaǵan shaqta Reseidiń shekara mańynda áskerdi kóbeitýi batystyń alańdaýshylyǵyn týǵyzdy. 2014 jyldyń sáýir aiynan beri munda 13 myńnan astam adam qaza bolǵan.
