Ýkraina men Reseidiń Bishkektegi elshileri Qyrǵyzstandaǵy baspasózde janjaldasyp qaldy. Oǵan ýkrainalyq diplomat Nikolai Doroshenkonyń jergilikti jýrnalistermen kezdesýi túrtki bolǵan. Al kelesi kúni Vesti.kg jańalyqtar saitynda "Qyrǵyzstandaǵy Ýkraina elshisi jergilikti jýrnalisterdi Reseimen janjaldastyryp qoiǵysy kele me?" dep atalatyn maqala jariialandy.
Materialda Reseidiń Bishkektegi elshisi Andrei Krýtkonyń sózderi berilgen. Ol ýkrainalyq áriptesin diplomatiialyq etikany buzdy dep aiyptaǵan. Buǵan qosa reseilik diplomat Ýkrainanyń shyǵysyndaǵy Avdeevkadaǵy jaǵdaidyń shielenisýi týraly aita kelip, ýkrainalyq bilikti arandatýshylyq áreketke bardy dep synaǵan.
"Avdeevkadaǵy jaǵdaiǵa keler bolsaq, taǵy bir arandatýshylyqtyń kýási boldyq. Urynyń birinshi bolyp aiqailatyny týraly maqaldy eske túsiredi", - dep málimdegen Krýtko.
Ýkraina elshisi buǵan kóp kúttirmei jaýap berdi. Nikolai Doroshenko Resei ókilin Ýkrainanyń ishki isine aralasýǵa bolmaitynyn eskertip, ózi halyqaralyq hattama aiasynda jumys jasaityndyǵyn aitqan.
Osylaisha Ýkrainanyń shyǵysyndaǵy jaǵdaiǵa qatysty pikirtalas Bishkektegi eki elshiniń baspasózdegi janjalyna ulasty.
