Ýkrainanyń Qyrǵyzstandaǵy elshi Valerii Jovtenko
Ýkraina prezidenti Vladimir Zelenskii Qyrǵyzstandaǵy elshi Valerii Jovtenko men Grýziiadaǵy elshi Igor Dolgovty keńesý úshin keri shaqyrdy. Bul týraly Zelenskii Facebook jelisindegi efirinde aitty, dep habarlady Azattyq radiosy.
Ýkraina basshysy Qyrǵyzstan biligi "Ýkrainaǵa qarsy agressiiany aqtaǵany úshin" elshini keri shaqyryp alǵanyn jetkizdi. Zelenskii Grýziia biligi Ýkrainaǵa erikti túrde kómekteskisi kelgenderge múmkindik bermedi dep málimdedi.
Qyrǵyzstan biligi Reseidiń Ýkrainaǵa basyp kirgenine qatysty resmi ustanymyn bildirmegen. Biraq 26 aqpanda Resei biliginiń baqylaýyndaǵy RIA Novosti agenttigi "Qyrǵyzstan prezidenti Sadyr Japarov Resei prezidenti Vladimir Pýtinmen telefonmen sóileskende kezinde Reseidiń Donbasstaǵy beibit turǵyndardy qorǵaý áreketine qoldaý bildirdi" dep jazǵan.
Biraq Qyrǵyzstan prezidentiniń resmi saitynda "eki eldiń basshylary halyqaralyq jáne aimaqtyń qaýipsizdigi boiynsha, sonymen qatar Ýkrainadaǵy jaǵdaiǵa qatysty pikir almasty" dep jazylǵan.
Japarovtyń baspasóz hatshysy Erbol Sultanbaev 27 aqpanda Facebook paraqshasynda "eki tarap jaqyn ýaqytta beibitshilikke qol jetkizedi dep úmittenemiz. Biz bul jaǵdaidyń tez arada kelissózder arqyly sheshilgenin qoldaimyz" dep jazǵan.
Qyrǵyzstan syrtqy ister ministri Rýslan Kazakbaev 27 aqpanda Ortalyq Aziia elderi men AQSh-tyń syrtqy ister vedomstvolarynyń onlain kezdesýinde Bishkek Ýkrainadaǵy jaǵdaiǵa alańdap otyrǵanyn jetkizgen.
"Bul qaqtyǵys eki aǵaiyn halyqtyń arasynda bolyp jatyr. Qyrǵyz halqy orys halqymen de, ýkrain halqymen de burynnan dostyq qarym-qatynasta. Biraq Qyrǵyzstan qazir álem birigýdiń ornyna bólinip jatqanyna qynjylady" degen Kazakbaev.
Resei 24 aqpanda Ýkraina aýmaǵyna kirip, soǵys bastaǵan. Soǵys jalǵasyp jatqanyna altynshy kún boldy. Eki jaqtan da adam shyǵyny bar.
