Ýkraina syrtqy ister ministri Halyqaralyq qylmystyq sot pen halyqaralyq uiymdardy Býcha qalasyna jáne Kievtiń túbindegi ózge de qalalar men selolarǵa múmkindiginshe tezirek kelip, Reseidiń áskeri qylmysy men adamzatqa qarsy qylmysyna aiǵaq bolatyn dálelderdi jinaýǵa shaqyrdy. Dmitrii Kýlebanyń málimdemesi Britaniianyń Times UK radio radiostantsiiasynyń efirinen aityldy, dep habarlaidy Azattyq radiosy.
Kýlebanyń sózinshe, qazirgi aiǵaqtar osy qylmysty jasaǵandardy jaýapqa tartý úshin halyqaralyq jáne sheteldik sottarda dálel retinde paidalanatylatyn bolady.
"Olar qala men selolardaǵy beibit adamdardy jai kúnderi ǵana emes, ketip bara jatqanda da qyryp ketti", – dedi Kýleba.
Ministr Resei áskeriniń "Ýkrainada jappai qylmys jasaǵanyn, kisi óltirý, azaptaý, zorlaý, tonaýmen ainalysqanyn" aitty.
"Mundaidy 21 ǵasyrda kózge elestetý múmkin emes edi, biraq dál qazir kóz aldymyzda bolyp jatyr. Resei IGIL-den de soraqy boldy,– dedi Kýleba.
Býchadaǵy beibit halyq qyrǵyny jaily habardan keiin ministr Kýleba "Reseige soqqy beretin sanktsiiany tez arada kúsheitýge" shaqyrǵan. Onyń sózinshe, "Reseidiń energo tasymalyna embargo salyp, Reseidiń barlyq kemeleri men taýarlaryn porttarda jaýyp tastaý jáne búkil bankterin SWIFT júiesinen ajyratý" kerek.
Ýkraina prezidenti Vladimir Zelenskii feisbýk paraqshasyna Býcha qalasyndaǵy jan shoshyrlyq sýretterdi salyp, Resei soldattarynyń analaryna qarata orys tilinde "Qandai súmelekterdi tárbielep, ósirgenderińizdi kórińizder. Qandyqol jendetter men tonaýshylar", – dep jazdy.
Resei Qorǵanys ministrligi Býchadaǵy qyrǵyndy moinyna alǵan joq. Onyń ornyna "Búkil fotosýrettter men videomaterialdar arandatý úshin jasalǵan. Bul - Kiev rejiminiń Batys BAQ-taryna arnap jasaǵan qoiylymy" degen málimdeme taratty.
"Resei men Ýkrainanyń Túrkiiadaǵy kelissóziniń erteńine, 30 naýryzda áskerimiz Býchadan shyǵaryldy" degen Resei Qorǵanys ministrligi Býcha meri Anatolii Fedorýktiń "qalada Resei áskeri qalǵan joq" degenin, ol habarda "beibit adamdar atylǵan" degen sóz bolmaǵanyn alǵa tartty.
Sáýirdiń 2-sine keshke Kiev janyndaǵy Býcha qalasynda ondaǵan, tipti júzdegen adamnyń denesi dalada shashylyp jatqany týraly habar tarai bastaǵan. Resei áskeri Býchada bir aidan astam ýaqyt turǵan. Olar ketken soń Ýkraina áskeri kirgen.
