Fýtboldan Eýropa chempionatynyń matchtaryna Ýkraina quramasy oiynshylary kietin jeide dizainy ózgermeidi. Bul týraly baspasóz máslihatynda quramanyń baspasóz hatshysy málimdedi. Máslihat jazbasy fýtbol federatsiiasynyń YouTube-arnasynda jariialandy.
"Formanyń barlyq bóligi ÝEFA-da (Eýropa fýtbol qaýymdastyqtary odaǵy – Red.) bekitilgen. Ýkraina fýtbol qaýymdastyǵynyń prezidenti qazir Rimde, ol odaq ókilderimen kelissóz júrgizip jatyr" dedi Ýkraina ulttyq quramasynyń ókili Aleksandr Glyvinskii. "
Eýropa chempionaty qarsańynda usynylǵan ulttyq qurama fýtbolshylarynyń formasynda Ýkraina kartasy jáne "Ýkraina jasasyn!", "Batyrlar dańqy arta bersin!" degen urandar jazylǵan. Resei saiasatkerleri Ýkrainanyń kartasynda Qyrym túbeginiń de beinelenýin ótkir synǵa alǵan. Halyqaralyq quqyqtyq qujattarda Qyrym Ýkraina jeri dep kórsetiledi, al Resei ol túbekti 2014 jyly zańsyz anneksiialaǵan bolyp sanalady. Máskeý bul pikirmen kelispeidi. Batys elderi Reseige osy úshin sanktsiialar salǵan.
Ýkraina quramasynyń el kartasy beinelengen jeidesi
Kiim dizainyna bailanysty Resei fýtbol odaǵy ÝEFA-ǵa shaǵymdanǵan. Halyqaralyq uiym ókili reseilik "Chempionat" basylymyna bergen suhbatynda Ýkraina kartasy da, "Ýkraina dańqy arta bersin!" degen uran da sol qalpy qala beredi degen. Alaida, sheneýniktiń aitýynsha, "Batyrlar dańqy arta bersin!" degen urannyń saiasi astary bar, sebebi bul sóz tirkesin kóbine Ýkrainanyń ultshyl uiymdary qoldanady.
ÝEFA Ýkraina fýtbol sheneýnikterinen kiimnen bul urandy alyp tastaýdy talap etken.
Alaida, juma kúni Ýkraina fýtbol qaýymdastyǵynyń atqarý komiteti Eýropadaǵy fýtbol chempionatyna arnap eki urandy da resmi túrde bekitken. Bul jóninde qaýymdastyq prezidenti Andrei Pavelko Facebook-tegi paraqshasynda málimdedi. Onyń aitýynsha, bul simvoldar eldiń ár aimaǵyndaǵy turǵyndardy, sondai-aq basqa elder men qurlyqtarda júrgen otandastardy biriktiredi. Ol fýtbol quramasyn "tarihi jeńisimen" quttyqtady.
Fýtboldan Eýropa chempionaty 11 maýsym – 11 shilde aralyǵynda qurlyqtaǵy 11 qalada (London, Sankt-Peterbýrg, Baký, Miýnhen, Rim, Amsterdam, Býharest, Býdapesht, Kopengagen, Glazgo, Sevilia) ótedi. Jarysqa irikteýden ótken 24 eldiń quramasy qatysady. Resei V tobynda, al Ýkraina quramasy S tobynda oinaidy.
