Ýkraina soty eldiń burynǵy prezidenti Viktor Ianýkovichti "memleketke opasyzdyq jasap, basqynshylyq soǵys júrgizýge járdem berdi" dep tanyp, syrttai 13 jylǵa sottady. Sot bul aiyptarǵa dálel retinde Ianýkovichtiń Resei biliginen Ýkrainaǵa ásker kirgizýdi suraǵan úndeýin keltirdi.
Sotqa Viktor Ianýkovichtiń ózi qatysqan joq. Advokatynyń aitýynsha, Ianýkovichke ota jasalǵan, qazir emdelip jatyr. Ýkraina aqparat quraldarynyń habarlaýynsha, sot protsesi kezinde Ianýkovich 70 ret sotqa shaqyrtý alǵan.
Byltyr qarashada Ianýkovichtiń advokattary onyń jaralanyp, emhanaǵa túsip qalǵanyn jáne sotqa tipti video bailanys arqyly da qatysa almaitynyn habarlaǵan. Kiev soty ol kezde Ianýkovichtiń aýrýhanada jatsa da, sottaǵy sońǵy sózin aitýyna ruqsat bergen. Biraq Ianýkovich sońǵy sózin aitqan da joq.
Ianýkovich ózine qarsy isti "qoldan jasalǵan, saiasi astary bar" dep, taǵylǵan aiyptardy joqqa shyǵarady. Ýkraina bas prokýratýrasy Ianýkovichti 15 jylǵa sottaýdy suraǵan.
Ianýkovich 2010-2014 jyldary Ýkraina prezidenti bolǵan. 2014 jyly eldegi saiasi daǵdarys kezinde Joǵarǵy rada sheshimimen bilikten shettetilgen. Keiin reseilik áskerilerdiń kómegimen osy elge qashyp ketken. Qazir Reseide turyp jatyr.
