Ýkraina barlaý qyzmetiniń jetekshisi general Kirill Býdanov Resei basshysy Vladimir Pýtinniń syrqat ekenin aitty.
Onyń málimdeýinshe, biliktiń eń joǵarǵy eshelonynda otyrǵan Pýtinniń saiasatymen kelispeitinder ony saiasattan tyqsyrýǵa daiyndalyp jatyr. Bul jóninde Býdanov britandyq Sky News telearnasyna bergen suhbatynda aitty.
Ýkraina barlaý basqarmasy basshysynyń sózine sensek, Pýtin onkologiialyq aýrýmen aýyrady. Ol Pýtinniń densaýlyǵy jaily tujyrymyn nege súienip aitqanyn naqtylamady.
Býdanov Ýkrainadaǵy soǵys jyl sońyna deiin jalǵasady, eń sheshýshi kezeń tamyz aiynda bolady dep boljaidy. Ýkraina barlaý qyzmeti jetekshisiniń aitýynsha, nátijesinde memleket qazir aiyrylyp qalǵan aýmaqtardy, onyń ishinde Donbass pen Qyrymdy da ózine qaitarady.
The Times basylymy senbi kúni Vladimir Pýtinniń densaýlyǵy jaily material jariialady. Basylym reseilik oligarh pen batys investory arasyndaǵy aýdioáńgimege súienedi. Amerikalyq New Lines tilshileriniń qolyna túsken áńgimede reseilik biznesmen Pýtinniń qan obyryna shaldyqqanyn aitady. Reseilik oligarhtyń sózinshe, Ýkrainany shabýyldaýǵa buiryq bergen Resei prezidenti "aqylynan adasqan", ol osylaisha Resei ekonomikasyn kúiretip jatyr. Oligarhtyń aty-jóni atalmaidy.
Osyǵan deiin Reseiden ketken milliarder Oleg Tinkov jýrnalist Iýrii Dýdqa bergen suhbatynda reseilik milliarderlerdiń basym bóligi Ýkrainadaǵy soǵysqa qarsy ekenin aitqan.
Eske salaiyq, jýyrda "Proekt" basylymy da Vladimir Pýtinniń densaýlyǵy jaily zertteý jariialap, onyń onkologiialyq aýrýlardy emdeitin hirýrg dárigerlerge birneshe ret qaralǵanyn jazǵan. Zertteý júrgizgender Pýtinniń byltyr qyrkúiekte aiaq asty oqshaýlanǵanyn, odan keiin ol álem liderleri ia úkimet múshelerimen kezdeskende óte alysta otyratynyn ańǵarǵan. Jýyrda qoldanýshylar Pýtinniń qorǵanys ministri Sergei Shoigýmen kezdesý kezindegi "erekshe qimylyna" nazar aýdarǵan.
Kreml Pýtinniń densaýlyǵyna bailanysty túsinikteme bermeidi nemese prezidenttiń densaýlyǵy jaqsy deýmen shekteledi. Pýtin jurt aldyna sirek shyǵady, alaida osy aptada Máskeýde 9 mamyrda ótken áskeri parad jáne ózge de sharalarǵa qatysqan.
Vladimir Pýtin 69 jasta. Onyń bastamasymen qabyldanǵan Konstitýtsiia túzetýlerine sáikes qaita sailansa, bilikte 2036 jylǵa deiin qala qalady.
