Kelesi jyldyń qańtarynda nemese aqpannyń basynda Resei Ýkrainaǵa qarsy belsendi áskeri qimyl bastaýy múmkin. Bul jóninde Ýkraina qorǵanys ministrligi Bas barlaý basqarmasynyń jetekshisi Kirill Býdanov Military Times basylymyna bergen suqbatynda aitty, dep habarlaidy Azattyq.
Býdanovtyń sózine qaraǵanda, qazir Resei Ýkrainamen shekarasyna 92 myńnan astam áskeri qyzmetkerin shoǵyrlandyrǵan. Qys túsip, kúshti aiaz bolsa da basyp kirý qaýpi kúsheimese azaimaidy, qatty aiaz Reseidiń de, Ýkrainanyń da áskerine úlken problema emes.
Ýkraina barlaý qyzmeti basshysynyń sózinshe, Resei áskeriniń qimyly 2014 jyldaǵydan áldeqaida aýqymdy bolýy múmkin. 2014 jyly Resei Qyrymdy anneksiialap, kóptegen kýálerdiń sózinde qaraǵanda Donbastaǵy seperatisterge qarýly kómek kórsetken (Resei muny joqqa shyǵardy).
Býdanovtyń aitýynsha Resei áýeden soqqy berip, Odessa men Mariýpolǵa desant túsirýi, brondy tehnikasyn qosýy múmkin. Ásker operatsiia úshin Belarýs jerin de paidalanýy yqtimal. Reseidiń negizgi nysanasy burynǵysha Ýkrainanyń ońtústigi men shyǵysy jáne Vladimir Pýtinnen bastap Reseidiń birqatar saiasatkerleri aityp júrgen "Novorossiia" aimaǵy bolady.
Basyp kirmes buryn áýeli Resei Ýkrainanyń urys qabiletine nuqsan keltiretin "psihologiialyq operatsiia" júrgizedi, - deidi Býdanov. Onyń sózinshe, bul úshin ekonomikalyq, áleýmettik jaǵdai men koronavirýspen kúres sharalaryna narazy kóńil kúidi paidalanyp, Ýkrainada bei-bereketsizdik týǵyzýdy kózdeidi.
Reseidiń Ýkrainaǵa shabýyl jasaýǵa "daiyndyǵy" jaily AQSh ákimshiligi men barlaý málimetterine súienip, Amerika baspasózi de jazǵan. Biraq olar Kreml naqty sheshim qabyldaǵan joq degen bolatyn.
New York Times "Vladimir Pýtinniń Ýkraina jeriniń úlken bóligin basyp alý nemese Ýkrainada turaqsyzdyq týǵyzyp, bilikke reseishil prezident keletindei jaǵdai týǵyzý maqsatynda áskeri operatsiia qarastyra bastaǵanyna Amerika men Britaniianyń barlaý qyzmeti kún ótken saiyn kóz jetkizip keledi" dep habarlaǵan.
"Eýropa Resei tabiǵi gazyna aitarlyqtai táýeldi bolǵan soń "Resei Ýkrainaǵa qarsy áskeri operatsiiamyzǵa qarsy Eýropa bel sheship kirise qoimaidy" dep úmittenedi dep jazady basylym.
Resmi Vashington men onyń Eýropa odaǵyndaǵy serikteri Reseidiń Ýkraina shekarasy boiyna áskeri kúshterin shoǵyrlanyp jatqanyna alańdaýshylyq bildirgen.
NATO-nyń Ulybritaniia siiaqty kei elderi Reseidiń áskeri piǵylyn tejeý úshin Ýkrainaǵa ásker jiberýdi kózdep otyrǵanyn habarlaǵan. Resmi Kiev Reseidiń basyp kirý qaýpin bastapqyda joqqa shyǵarǵanymen keiin alańdai bastaǵan.
Kreml Ýkrainaǵa qarsy qandai da bir áskeri operatsiiaǵa daiyndyq týraly aqparattardy teriske shyǵarǵan jáne ásirese "Qara Teńizdegi jaǵdaidy ýshyqtyryp otyr" dep Batysty kinalaǵan. Resei syrtqy ister ministrliginiń alqa otyrysynda sóilegen Pýtin "Resei Batystan óz qaýipsizdigine kepildik alýy kerek" dep málimdegen.
