Qytaidan Qazaqstanǵa "shekarany zańsyz kesip ótti" dep aiyptalǵan etnikalyq qazaqtar Qaster Musahanuly men Murager Álimulyn Qytaiǵa qaitarylady, dep málimdedi Qazaqstan Ulttyq qaýipsizdik komiteti tóraǵasynyń orynbasary, shekara qyzmetiniń direktory Darhan Dilmanov. Ol bul sózin 6 jeltoqsanda Ulttyq qaýipsizdik komitetiniń baspasóz qyzmeti taratqan videosuhbatta aitqan.
"Sot jáne qylmystyq jaýapkershilikke tartý sharalary túgeldei aiaqtalǵannan keiin biz bul azamattardy meili Qytai bolsyn, meili basqa memleket bolsyn, kelgen eline qaitaramyz. Naqty bul jaǵdaida biz Qytai Respýblikasyna shekaralyq ókildik qyzmeti arqyly tapsyramyz. Ári qarai kórshi memleket máselemen ózi ainalysady" dedi Darhan Dilmanov. Onyń sózinshe, eki azamatqa qatysty sot jaqynda bastalýy tiis. Dilmanov Qazaqstannyń zańsyz kóshi-qon protsesimen "qatań kúresetinin" aitqan.
Musahanuly men Álimulynyń advokaty Lázzat Ahatova ol "ekeýi Qytai jaǵyna tapsyrylatynyn" aitqan shekara qyzmetiniń direktory Darhan Dilmanovpen kelispeidi.
"Qytai men Qazaqstan arasynda 2006 jyly 14 jeltoqsanda jasalǵan kelisimde memlekettik shekarany shatasyp, ne ańdamai buzyp ótken eki el adamdary jeti kún ishinde qaitarylady delingen. Sotqa jetpei, jeti kún ishinde. Al bizdiń jaǵdaida eki jigit shekarany qazan aiynda buzyp ótken. Qazir jeltoqsan aiy. Iaǵni, jeti kún emes, eki aidan asyp ketti. Odan ózge, eki jigittiń ústinen Qylmystyq kodekstiń 392-babymen qylmystyq is qozǵaldy. Ol is tolyq aiaqtalmai, sot sheshim shyǵarmai, Qaster men Muragerdi eshkim eshqaida qozǵai almaidy" dep jazdy advokat 6 jeltoqsanda Facebook áleýmettik jelisindegi paraǵyna.
Qazan aiynyń basynda Qytai qazaqtary Qaster Musahanuly men Murager Álimulynyń Qazaqstanǵa "shekarany zańsyz kesip ótkeni" týraly aqparat taraǵan. 14 qazanda Almatydaǵy adam quqyǵyn qorǵaý biýrosynda ótken baspasóz máslihatynda Qaster Musahanuly Shyńjańdaǵy "saiasi lagerde qamaýda bolǵanyn", Murager Álimuly Qytaida "qysym kórgenin" aitqan edi. Qazan aiynyń ortasynda UQK olardy "shekaradan zańsyz ótti" dep aiyptap, Óskemen qalasyndaǵy tergeý izoliatoryna jetkizgen.
Osydan birneshe kún buryn advokat Lázzat Ahatova Azattyq tilshisine tergeý amaldary aiaqtalǵanyn, is materialdarymen tanysyp jatqanyn habarlaǵan. Advokat Óskemende qamaýda otyrǵan eki jigittiń Qytaida qalǵan týystaryna qysym jalǵasyp jatqanyn da aitqan.
Qazaqstan biliginen bosqyn mártebesin suraǵan Qytaidyń eki azamatyna qazan aiynyń sońynda "pana izdeýshi tulǵa" kýáligi berilgen edi.
Murager Álimuly men Qaster Musahanulynyń taǵdyryna alańdaǵan bir top belsendi buǵan deiin baspasóz jiynyn ótkizip, eger Qytaiǵa qaitarylsa, ekeýiniń ómirine qaýip tónetinin aityp, Qazaqstan biliginen olarǵa bosqyn mártebesin berýin suraǵan.
