قىتايدان قازاقستانعا "شەكارانى زاڭسىز كەسٸپ ٶتتٸ" دەپ ايىپتالعان ەتنيكالىق قازاقتار قاستەر مۇساحانۇلى مەن مۇراگەر ەلٸمۇلىن قىتايعا قايتارىلادى, دەپ مەلٸمدەدٸ قازاقستان ۇلتتىق قاۋٸپسٸزدٸك كوميتەتٸ تٶراعاسىنىڭ ورىنباسارى, شەكارا قىزمەتٸنٸڭ ديرەكتورى دارحان دٸلمانوۆ. ول بۇل سٶزٸن 6 جەلتوقساندا ۇلتتىق قاۋٸپسٸزدٸك كوميتەتٸنٸڭ باسپاسٶز قىزمەتٸ تاراتقان ۆيدەوسۇحباتتا ايتقان.
"سوت جەنە قىلمىستىق جاۋاپكەرشٸلٸككە تارتۋ شارالارى تٷگەلدەي اياقتالعاننان كەيٸن بٸز بۇل ازاماتتاردى مەيلٸ قىتاي بولسىن, مەيلٸ باسقا مەملەكەت بولسىن, كەلگەن ەلٸنە قايتارامىز. ناقتى بۇل جاعدايدا بٸز قىتاي رەسپۋبليكاسىنا شەكارالىق ٶكٸلدٸك قىزمەتٸ ارقىلى تاپسىرامىز. ەرٸ قاراي كٶرشٸ مەملەكەت مەسەلەمەن ٶزٸ اينالىسادى" دەدٸ دارحان دٸلمانوۆ. ونىڭ سٶزٸنشە, ەكٸ ازاماتقا قاتىستى سوت جاقىندا باستالۋى تيٸس. دٸلمانوۆ قازاقستاننىڭ زاڭسىز كٶشٸ-قون پروتسەسٸمەن "قاتاڭ كٷرەسەتٸنٸن" ايتقان.
مۇساحانۇلى مەن ەلٸمۇلىنىڭ ادۆوكاتى لەززات احاتوۆا ول "ەكەۋٸ قىتاي جاعىنا تاپسىرىلاتىنىن" ايتقان شەكارا قىزمەتٸنٸڭ ديرەكتورى دارحان دٸلمانوۆپەن كەلٸسپەيدٸ.
"قىتاي مەن قازاقستان اراسىندا 2006 جىلى 14 جەلتوقساندا جاسالعان كەلٸسٸمدە مەملەكەتتٸك شەكارانى شاتاسىپ, نە اڭداماي بۇزىپ ٶتكەن ەكٸ ەل ادامدارى جەتٸ كٷن ٸشٸندە قايتارىلادى دەلٸنگەن. سوتقا جەتپەي, جەتٸ كٷن ٸشٸندە. ال بٸزدٸڭ جاعدايدا ەكٸ جٸگٸت شەكارانى قازان ايىندا بۇزىپ ٶتكەن. قازٸر جەلتوقسان ايى. ياعني, جەتٸ كٷن ەمەس, ەكٸ ايدان اسىپ كەتتٸ. ودان ٶزگە, ەكٸ جٸگٸتتٸڭ ٷستٸنەن قىلمىستىق كودەكستٸڭ 392-بابىمەن قىلمىستىق ٸس قوزعالدى. ول ٸس تولىق اياقتالماي, سوت شەشٸم شىعارماي, قاستەر مەن مۇراگەردٸ ەشكٸم ەشقايدا قوزعاي المايدى" دەپ جازدى ادۆوكات 6 جەلتوقساندا Facebook ەلەۋمەتتٸك جەلٸسٸندەگٸ پاراعىنا.
قازان ايىنىڭ باسىندا قىتاي قازاقتارى قاستەر مۇساحانۇلى مەن مۇراگەر ەلٸمۇلىنىڭ قازاقستانعا "شەكارانى زاڭسىز كەسٸپ ٶتكەنٸ" تۋرالى اقپارات تاراعان. 14 قازاندا الماتىداعى ادام قۇقىعىن قورعاۋ بيۋروسىندا ٶتكەن باسپاسٶز مەسليحاتىندا قاستەر مۇساحانۇلى شىڭجاڭداعى "ساياسي لاگەردە قاماۋدا بولعانىن", مۇراگەر ەلٸمۇلى قىتايدا "قىسىم كٶرگەنٸن" ايتقان ەدٸ. قازان ايىنىڭ ورتاسىندا ۇقك ولاردى "شەكارادان زاڭسىز ٶتتٸ" دەپ ايىپتاپ, ٶسكەمەن قالاسىنداعى تەرگەۋ يزولياتورىنا جەتكٸزگەن.
وسىدان بٸرنەشە كٷن بۇرىن ادۆوكات لەززات احاتوۆا ازاتتىق تٸلشٸسٸنە تەرگەۋ امالدارى اياقتالعانىن, ٸس ماتەريالدارىمەن تانىسىپ جاتقانىن حابارلاعان. ادۆوكات ٶسكەمەندە قاماۋدا وتىرعان ەكٸ جٸگٸتتٸڭ قىتايدا قالعان تۋىستارىنا قىسىم جالعاسىپ جاتقانىن دا ايتقان.
قازاقستان بيلٸگٸنەن بوسقىن مەرتەبەسٸن سۇراعان قىتايدىڭ ەكٸ ازاماتىنا قازان ايىنىڭ سوڭىندا "پانا ٸزدەۋشٸ تۇلعا" كۋەلٸگٸ بەرٸلگەن ەدٸ.
مۇراگەر ەلٸمۇلى مەن قاستەر مۇساحانۇلىنىڭ تاعدىرىنا الاڭداعان بٸر توپ بەلسەندٸ بۇعان دەيٸن باسپاسٶز جيىنىن ٶتكٸزٸپ, ەگەر قىتايعا قايتارىلسا, ەكەۋٸنٸڭ ٶمٸرٸنە قاۋٸپ تٶنەتٸنٸن ايتىپ, قازاقستان بيلٸگٸنەن ولارعا بوسقىن مەرتەبەسٸن بەرۋٸن سۇراعان.
