QR Ulttyq qaýipsizdik komitetiniń Shekara qyzmeti karantindik shekteýler kezeńindegi Qazaqstannyń memlekettik shekarasyn kesip ótýdiń qazirgi erejelerin túsindirdi, dep habarlaidy "Ult aqparat".
Instagram paraqshasynda bul týraly Shekara qyzmetiniń shekaralyq baqylaý departamentiniń ofitseri Erlan Daniiarov aitty.
«Búgingi tańda COVID-19 pandemiiasyna bailanysty memlekettik shekarany kesip ótý ýaqytsha shektelgen. Osyǵan bailanysty Qazaqstan Úkimeti janyndaǵy vedomstvoaralyq komissiia karantindik shekteýler kezeńinde shekaradan ótý tártibin bekitti. Shekaradan ótýge ruqsat etilgen adamdardyń tizbesi anyqtaldy. Bul rette Qazaqstan azamattary el aýmaǵyna kedergisiz orala alady, al sheteldikter Qazaqstannan kete alady. Shekteýler sondai-aq diplomattarǵa, ushaqtardyń, poiyz brigadalarynyń, teńiz kemeleriniń ekipajdaryna, júk avtokóliginiń, transshekaralyq qurylystardyń qyzmet kórsetýshi personalyna jáne basqa da adamdar sanattaryna qoldanylmaidy. Memlekettik shekarany kesip ótýge ruqsat etilgen adamdardyń tolyq tizbesimen UQK saitynda tanysa alasyzdar», - dedi Erlan Daniiarov.
Onyń aitýynsha, Qazaqstan azamattaryna Ýkraina, Belarýs, Germaniia, Niderlandy, BAÁ, Ońtústik Koreia, Túrkiia, al taiaýdan beri Resei, Ózbekstan, Qyrǵyzstan siiaqty Qazaqstan Úkimetiniń sheshimi boiynsha tikelei áýe qatynasy jandandyrylǵan shet elderge ketýge ruqsat etiledi.
«Eger halyqaralyq sharttarda ózgeshe tártip qarastyrylmaǵan bolsa, vizalyq talaptardy saqtai otyryp, atalǵan elderdiń azamattary bolyp tabylatyn sheteldikterge de Qazaqstanǵa áýe kóligimen kirýge ruqsat etiledi. Osy jyldyń 3 qyrkúieginen bastap karantin sharalarynyń álsireýin eskere otyryp, sheteldik azamat Qazaqstanmen áýe qatynasy qaita jandandyrylǵan elden tikelei kelýi kerek degen talaptar alynyp tastaldy. Mysaly Germaniia azamaty vizasy bolǵan jaǵdaida BAÁ-den Qazaqstanǵa tikelei áýe reisimen qandai da bir shekteýsiz kele alady. Sonymen qatar qaita jandandyrylǵan áýe reisterin azamattyǵyna qaramastan karantindik shekteýler kezeńinde memlekettik shekarany kesip ótý tártibine sáikes kirýge ruqsat berilgen sheteldikterdiń basqa sanattary da (mysaly VAK sheshimi boiynsha otbasy músheleri emdelýge, oqýǵa jáne basqalary) paidalana alady», - dedi ol.
Erlan Daniiarovtyń sózinshe, Bas sanitariiarlyq dárigerdiń qaýlysyna sáikes, 6 qazannan bastap sheteldikter Qazaqstanǵa kelgen kezde ózimen birge merzimi 72 saǵattan aspaityn PTR-anyqtamalary bolýy qajet. Al Qazaqstan azamattary anyqtama bolmaǵan jaǵdaida eki táýlikke karantindik statsionarǵa oqshaýlanady.
Shekara qyzmeti karantindik shekteýler kezinde shekaradan ótý tártibi týraly 8 (7172) 719-111 anyqtama qyzmetiniń nómiri boiynsha táýlik saiyn jumys ýaqytynda telefon arqyly konsýltatsiia beredi.
