QR ulttyq qaýipsizdik komitetiniń burynǵy basshysy Nartai Dútbaevqa ekinshi úkim shyqty, dep habarlaidy Áskeri sottyń saity.
Sot úkimi 26 qańtar kúni shyqqan, biraq bul jaiynda búgin ǵana belgili boldy.
Is materialdarynda memlekettik qupiiaǵa jatatyn málimetter bolýyna bailanysty sot talqylaýy jabyq sot otyrysynda ótkizildi.
Sot úkimine sáikes, N.N.Dútbaev 1997 jylǵy redaktsiiadaǵy QR QK 176-baby 3-tarmaǵy "b", "g" tarmaqshalary (senip tapsyrylǵan bóten múlikti iemdený nemese ysyrap etý) jáne 380-baptyń 2-tarmaǵy (bilikti teris piǵylda paidalaný), sondai-aq, QR QK 218-baby 3-tarmaǵy 1,3 tarmaqshalary (qylmystyq jolmen alynǵan aqshany nemese múlikti zańdastyrý) boiynsha kináli dep tanyldy. QR QK 55-baby negizinde jazany ishinara biriktirý jolymen 10 jylǵa bas bostandyǵynan aiyrý jazasy belgilendi. Qazaqstan Týelsizdigine 25 jyl tolýyna orai jariialanǵan raqymshylyq negizinde jazanyń ótelmegen merzimi jartysyna qysqaryp, 5 jylǵa bas bostandyǵynan aiyrý jazasy belgilendi.
Jaza merzimin 2017 jyldyń 24 tamyzynda Aqmola garnizonynyń áskeri soty shyǵarǵan úkimdegi jazamen ishinara biriktirý jolymen 12 jylǵa bas bostandyǵynan aiyrý jazasy belgilendi. Sondai-aq sot úkimimen Dútbaevtyń zańsyz jolmen tapqan múligi tárkilenip, memlekettik qyzmette isteý quqyǵynan ómir boiyna aiyryldy.
Nartai Dútbaevtyń baýyry Rústembek Dútbaev ta QR QK 176-baby 3-tarmaǵy "b" tarmaqshasy (1997 jylǵy redaktsiiadaǵy), 218-baby 3-tarmaǵy 3-tarmaqshasy boiynsha aiypty dep tanyldy. Jazany ishinara biriktirý jolymen múlki tárkilenýmen jáne memlekettik qyzmette isteý quqyǵynan ómir boiyna aiyrýmen 8 jylǵa bas bostandyǵynan aiyrý jazasy belgilendi.
Istiń taǵy bir figýranty – eks-májilismen Orynbasar Qalqabaev QR QK 176-baby 3-tarmaǵy "b", "g" tarmaqshalary (1997 jylǵy redaktsiiadaǵy), 218-baby 3-tarmaǵy 1,3 tarmaqshalary boiynsha kináli dep tanyldy. Jazany ishinara biriktirý jolymen múlki tárkilenýmen jáne memlekettik qyzmette isteý quqyǵynan ómir boiyna aiyrýmen 8 jyl bas bostandyǵynan aiyrý jazasy belgilendi.
Sot úkimi zańdy kúshine engen joq.
