Búgin Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý boiynsha QR Premer-Ministriniń orynbasary Gúlshara Ábdiqalyqova bastaǵan úkimettik jumys toby Túrkistan oblysyna bardy. Bul týraly QR Premer-Ministriniń baspasóz qyzmeti habarlady.
Q. A. Iassaýi atyndaǵy Halyqaralyq Qazaq–Túrik ýniversitetiniń Mádeniet saraiynda kóp balaly analarmen, az qamtylǵan otbasylarmen, eńbek ardagerlerimen, múmkindikteri shekteýli jandarmen, bilim jáne densaýlyq saqtaý salasynyń qyzmetkerlerimen kezdesýler ótti.
«Búginde memlekettik saiasattyń negizgi basymdyǵy halyqtyń laiyqty turmys deńgeiin qamtamasyz etý. Respýblikalyq biýdjetten áleýmettik salaǵa barlyq shyǵyndardyń 45% baǵyttaldy. Túrli baǵdarlamalar aiasynda aýqymdy áleýmettik investitsiialar iske asyrylýda. Eń bastysy, áleýmettik saiasat teńdestirilgen jáne áleýmettik asyraýda bolýǵa itermelemeýi kerek», — dedi G. Ábdiqalyqova.
Halyqpen kezdesý aiaqtalǵannan keiin G. Ábdiqalyqova az qamtylǵan azamattarǵa áleýmettik qoldaý kórsetý boiynsha memlekettik sharalardy túsindirý boiynsha azamattardyń jeke qabyldaýyn ótkizdi.
Túrkistan oblysynda QR Premer-Ministriniń orynbasary Kúltóbe qalashyǵyndaǵy ǵylymi-restavratsiialyq jumystarmen tanysty jáne memlekettik organdardyń, vedomstvoǵa baǵynysty mekemelerdiń jáne IýNESKO-nyń halyqaralyq sarapshylarynyń ókilderimen kezdesý ótkizdi. Keńes barysynda Qazaqstannyń tarihi murasy — Q. A. Iassaýi kesenesin saqtaý máseleleri talqylandy. Keńes qorytyndysy boiynsha naqty tapsyrmalar berildi.
Eńbek jáne halyqty áleýmettik qorǵaý ministri B. Saparbaev Halyqty jumyspen qamtý ortalyǵynyń jumysyn tekserip, jańa formatta ataýly áleýmettik kómek kórsetý protsesimen tanysty. Búgingi tańda oblysta AÁK alýshylar sany 207 myńnan 283 myń adamǵa deiin artty, osy maqsattarǵa qarjy qajettiligi 14 mlrdtan 45 mlrd teńgege deiin ósti.
Jumys toby «Kentaý transformator zaýyty» AQ bazasynda aýdandar, qalalar ákimderimen, ónerkásiptik kásiporyndardyń basshylarymen, biznes-qurylymdar, kásipodaqtyq uiymdar basshylarymen keńes ótkizdi. G. Ábdiqalyqova ónerkásiptik kásiporyndardyń, biznes qurylymdardyń basshylaryn ózderiniń tabysy tómen qyzmetkerlerin qoldaýǵa, turǵyn úi satyp alýǵa kómektesýge, olardy jóndeýge qarajat bólýge, baspana nesieleri boiynsha bastapqy jarnalardy tólep berýge shaqyrdy.
Búginde óńir kásipkerleri 11 kóp balaly otbasyny turǵyn úimen qamtamasyz etti. Qazyǵurt aýdanynyń kásipkeri S. Ertaev kóp balaly Erjanovtar otbasyna úi satyp alyp berdi jáne Túrkiiada naýqas balanyń otbasyna operatsiia jasaýǵa 4 mln teńge bóldi.
Jumys tobynyń músheleri densaýlyq saqtaý, bilim berý salasynyń qyzmetkerlerimen birqatar kezdesýler ótkizdi, azamattardy qabyldady, sondai-aq áleýmettik nysandar men qurylys alańdaryna bardy. Bilim jáne ǵylym ministri K. Shámshidinova Kentaý qalasynda boldy, densaýlyq saqtaý vitse-ministri L. Aqtaeva men Qurylys jáne turǵyn-kommýnaldyq sharýashylyq isteri komitetiniń tóraǵasy M. Jaiymbetov Túrkistan qalasynda boldy.
Jumys tobynyń quramyna eńbek jáne halyqty áleýmettik qorǵaý ministri B. Saparbaev, bilim jáne ǵylym ministri K. Shámshidinova, densaýlyq saqtaý vitse-ministri L. Aqtaeva, Qurylys jáne turǵyn-kommýnaldyq sharýashylyq isteri komitetiniń tóraǵasy M. Jaiymbetov kirdi.
.jpeg)