Elbasy Saǵyntaev basqarǵan Úkimetti otstavkaǵa jiberdi. Memleket basshysy júieli jumystardyń júrgizilmegenin, áleýmettik problemalardyń qordalana túskenin ashyq aitty. «Onyń ústine Úkimet músheleri, ministrler, ákimder halyqpen jumys istei almady, sondai-aq jurtshylyqtyń problemalaryna qulaq asyp, atqarylyp jatqan ister men saiasatty túsindirý jumystaryn júrgizýge shamasy kelmedi» dedi. Keibir qoǵam belsendileri Elbasy sheshimin sońǵy jaǵdailardaǵy shielenisti oqiǵalarmen bailanystyryp, «Kópbalaly analar taratqan Úkimet» degen aidar taǵyp úlgerdi. Ne desek te, Úkimettiń jańa quramyna artylar júk aýyr bolmaq.
Keshegi jańalyqtan keiin «Kelesi Premer kim bolady?» degen suraqtyń bas kótergeni anyq. Qazirdiń ózinde saiasattanýshylar men qoǵam belsendileri túrli joramal jasap, aýys-túiis týraly áńgimeni jandandyra tústi.
Ult portaly buǵan deiin Úkimettegi ózgeristerge boljam jasap, óz joramalyn usynǵan bolatyn. Alaida biz oilaǵan «úlken ózgeris» ótken kúzden biylǵy jylǵa «shegerilgen» eken.
Kúzden keiin Prezident Ákimshiliginiń basshysy aýysyp, ministrler kabinetinde de bireń-sarań ózgerister bolǵanmen, aitarlyqtai aýys-túiister bola qoiǵan joq.
Biz búgin aldaǵy bolatyn taǵaiyndaýlardyń aldyn alyp, az-kem bojam jasaýdy uiǵardyq.
Árine, alǵashqy oi Saǵyntaevtyń ornyn kim basady degen saýaldyń tóńiriginde týyndaidy. Joramalshylar negizgi basymdyqty dál qazir Úkimet basshysy mindetin atqaryp otyrǵan Asqar Maminge beredi. Saiasattanýshy Aidos Sarym da Elbasy jańa premer-ministrlikke Mamindi usynady dep topshylaidy. «Prezidentke táýlik boiy ákimder men ministrlerdi túrtpektep, qaýzap otyratyn qatal basshy kerek. Bul maqsatqa Mamin óte laiyq adam. Ol eńbekqor jáne birshama qatal basshy» deidi ol.
Úkimetbasy bolýy múmkin tulǵalardyń qatarynda QR Premer-Ministriniń orynbasary - Qorǵanys jáne aeroǵarysh ónerkásibi ministri Asqar Jumaǵaliev pen «Samuryq-Qazyna» AQ Basqarma Tóraǵasy Ahmetjan Esimovtiń esimi jii aitalady.
Sondai-aq eki márte Premer-Ministr bolǵan, qazirgi Ulttyq qaýipsizdik komiteti tóraǵasy Kárim Másimovtyń qaita oralýy ǵajap emes.
Taǵy bir joramal Almaty ákimi Baýyrjan Baibektiń Astanaǵa aýysyp, Saǵyntaevtyń orynyn basýy múmkin ekenin kórsetedi.
Buǵan deiin biz boljaǵandai, Úkimettiń aýysýy Qazaqstannyń Reseidegi elshisi Imanǵali Tasmaǵambetovti elge qaitarýy múmkin. Premer-Ministr laýazymyna Imanǵali Nurǵaliulyn laiyq kóretinderdiń qatary kóp. Qazirgi jaǵdaida onyń saiasi salmaǵy men kópjyldyq tájiribesi, bilimi men biliktiligi, tez sheshim qabyldaityn qarym-qabileti qajet ekeni sózsiz.
Májilis Tóraǵasy Nurlan Nyǵmatýlin men QR Prezidenti ákimshiliginiń basshysy Áset Isekeshevti de Úkimet basynda otyrýy tiis saiasi salmaǵy joǵary tulǵalardyń qataryna qosatyndar jeterlik.
Degenmen, kútpegen sheshimder qabyldanyp, múlde basqa tulǵalardyń boi kórsetýi múmkin ekenin eshkim joqqa shyǵara almaidy.
Úkimet basshysynyń aýysýy ministrler kabinetinen bastap ákimder korpýsynyń ózgerýine sebep bolýy tiis.
Bizdiń oiymyzsha, taǵaiyndalǵanyna kóp bola qoimaǵan Ishki ister ministri Erlan Turǵumbaev pen Qarjy ministri Álihan Ashanuly, Syrtqy ister ministri Beibit Atamqulov jáne qurylǵanyna kóp ýaqyt ótpegen Indýstriia jáne infraqurylymdyq damý ministrliginiń basshysy Jeńis Qasymbek óz ornynda qalady.
Keshegi órtke oranǵan bes bala oqiǵasynan bastalyp, analar mintingine deiin ulasqan qoǵamdyq tolqý Eńbek jáne áleýmettik qorǵaý ministri Mádina Ábilqasymovany bir shaiqap ótti. Ózgeristerdiń basy dál osy ministrlikten bastalyp, jii syn sadaǵyna iligetin QR Bilim jáne ǵylym ministrigine de jetýi múmkin.
Bul rette, «ásire reformashyl» ministr Erlan Saǵadievke de tyqyr taianǵan sekildi. Qazirdiń ózinde bul qyzmetke «Nazarbaev Ziiatkerlik mektepteri» DBBU Basqarma Tóraiymy Kúlásh Shámshidinova men keiingi kezde belsendiligimen kózge túsip, oń pikir qalyptastyrǵan Elmira Sýhanberdieva usynylyp úlgerdi.
Aqtóbe oblysy ákimi Berdibek Saparbaevtyń Eńbek jáne áleýmettik qorǵaý ministri laýazymyn qaita oralýyn qalaityndardyń sany az emes. Bul orynnan QR Eńbek jáne halyqty áleýmettik qorǵaý vitse-ministri Svetlana Jaqypova da úmitti.
Qazirgi bilik olimpinde saiasi yqpaly men salmaǵy edáýir artqan Aida Balaeva Mádeniet jáne sport nemese Aqparat jáne kommýnikatsiialar ministrliginiń tizginin ustaýy múmkin. Tipti bir oblysqa basshy bolyp, áielder arasynan shyqqan tuńǵysh ákim atanýy bek múmkin.
QR Mádeniet jáne sport ministri Arystanbek Muhamediulynyń QR Memlekettik hatshysy laýazymyna kóterilýi yqtimal ekenin burynyraq jazǵan bolatynbyz. Al, bul oryndy qazirgi vitse-ministr Erlan Qojaǵapanov almastyrýy múmkin.
Sondai-aq Óskemen qalasy ákimi Jaqsylyq Omar men BQO ákimi Altai Kólginov te ministr oryntaǵyna jaiǵasýy múmkin tulǵalardyń qatarynda.
Aqparat jáne kommýnikatsiialar ministri Dáýren Abaev Almaty oblysynyń ákimi, zeinet jasyndaǵy Amandyq Batalovtyń ornyna baryp, ákimdik qyzmetke aýysýy múmkin.
«Qazaqstan» RTRK» AQ Basqarma Tóraǵasy Erlan Qarin Aqparat jáne kommýnikatsiialar ministri bolady degen de sybys bar. Taǵy bir aqparat kózi Erlan Tynymbaiuly QR Prezidentiniń baspasóz hatshysy Aidos Úkibaidy almastyrady degen oidy qýattaidy.
Bir jyldary Mádeniet jáne aqparat vitse-ministri bolǵan, qazirgi Almaty qalasy ákiminiń orynbasary Arman Qyryqbaev ta ideologiialyq bir ministrliktiń tizginin ustaýy múmkin.
Sońǵy kezde zeinet jasyndaǵy Shyǵys Qazaqstan oblysyna ákimi Danial Ahmetov pen Almaty oblysy ákimi Amandyq Batalovtyń senatorlar qataryn tolyqtyratyny týraly jii aityla bastady. Áńgime aýanyna qaraǵanda atalǵan oblystarǵa jańa basshy taǵaiyndalýy áste múmkin.
Árine, munyń bári boljam ǵana. Naqty saiasi ózgeristerdiń sheshimi Aqordanyń quzyrynda.
