Keshe keshkisin Memleket basshysy Nursultan Nazarbaev tossynnan málimdeme jasap, el ekonomikasyn sapaly damytýǵa serpin beretin naqty quraldardy tolyqqandy jasap shyǵara almaǵan, memlekettik baǵdarlamalardy júzege asyrý barysynda naqty nátijelerge qol jetkizbegen Baqytjan Saǵyntaev basshylyq jasaityn Úkimet otstavkaǵa ketýi tiistigin aitqan bolatyn.
«Úkimet músheleri, ministrler, ákimder halyqpen jumys istei almady, sondai-aq jurtshylyqtyń problemalaryna qulaq asyp, atqarylyp jatqan ister men saiasatty túsindirý jumystaryn júrgizýge shamasy kelmedi. Bul rette, men el Prezidenti ári Konstitýtsiianyń kepili retinde halyqtyń múddesin eskere otyryp, mynadai sheshim qabyldadym. Úkimet otstavkaǵa ketýge tiis dep sanaimyn», - degen edi Nursultan Nazarbaev.
Baqytjan Saǵyntaev ta uzaq kúttirgen joq, el Úkimetiniń otstavkaǵa ketýine bailanysty arnaiy málimdeme jasady.
«Búgin Úkimet otstavkaǵa ketti. Táýelsiz Qazaqstan memleketiniń negizin qalap, búgingi biikterge jetkizgen Elbasy halqynyń ósip-órkendeýin árqashan eń basty qaǵida retinde ustanyp, árbir sheshimin memleket pen halyqtyń múddesi turǵysynan qabyldap keledi. Memleket qurý ońai jumys emes. Jas memleketti túrli qaishylyqtar men qaqtyǵystardan aman alyp ótip, tarihi ólshemmen alǵanda tym qysqa merzimde osyndai abyroily El etý shyn máninde sheksiz qurmetke laiyq», - dep atap ótti ol.
Osydan keiin Nursultan Nazarbaev QR Úkimetiniń ornynan túsýi týraly Jarlyqqa qol qoiyp, Premer-Ministrdiń mindetin ýaqytsha atqarýdy Asqar Maminge júktegen edi.
Endi QR Konstitýtsiiasynyń 44-babynyń 3 tarmaǵyna sáikes, Qazaqstan Respýblikasynyń Prezidenti Parlament Májilisinde ókildigi bar saiasi partiialar fraktsiialarymen konsýltatsiialardan keiin kelisim berý úshin Májilistiń qaraýyna Respýblika Premer-Ministriniń kandidatýrasyn engizedi. Parlament Májilisiniń kelisimi alynǵannan keiin Respýblikanyń Premer-Ministrin qyzmetke taǵaiyndaidy.
Sonan soń Memleket basshysy Premer-Ministrdiń usynýymen Úkimettiń qurylymyn aiqyndap, Parlament Májilisimen konsýltatsiialardan keiin Premer-Ministrdiń usynýymen Úkimet múshelerin qyzmetke taǵaiyndaidy. Bul rette Memleket basshysy Syrtqy ister, Qorǵanys, Ishki ister ministrlerin qyzmetke derbes taǵaiyndaityndyǵyn eskergen jón.
«Qazaqstan Respýblikasynyń Úkimeti týraly» Konstitýtsiialyq zańnyń 3-1-babyna sáikes Qazaqstan Respýblikasy Úkimetiniń múshesi Qazaqstan halqyna jáne Prezidentine ant beredi.
Úkimet músheleriniń antyn Respýblika Prezidenti ózi belgileitin tártippen qabyldaidy.
Aita keterligi, qazirgi ýaqytta qoǵamda «Úkimet múshelerimen birge oblys ákimderi de otstavkaǵa ketedi» degen aqparat tarap júr. Bul múldem jańsaq pikir. Úkimet músheleri otstavkasynyń oblys ákimderine esh qatysy joq. Ol elimizdiń Konstitýtsiiasynyń 87-babynda taiǵa tańba basqandai jazylǵan. Atalǵan baptyń 4-tarmaǵynda «Oblystardyń, respýblikalyq mańyzy bar qalalardyń jáne astananyń ákimderin qyzmetke tiisinshe oblystardyń, respýblikalyq mańyzy bar qalalardyń jáne astananyń máslihattarynyń kelisimimen Respýblika Prezidenti taǵaiyndaidy. Ózge ákimshilik-aýmaqtyq bólinisterdiń ákimderi zańda aiqyndalatyn tártippen qyzmetke taǵaiyndalady nemese sailanady, sondai-aq qyzmetinen bosatylady. Respýblika Prezidenti óziniń uiǵarýy boiynsha ákimderdi qyzmetterinen bosatýǵa haqyly», - delingen.
