Búgin QR Premer-Ministriniń orynbasary Gúlshara Ábdiqalyqova bastaǵan Úkimettiń áleýmettik blogynyń birinshi basshylarynan quralǵan jumys toby Elbasynyń «Áleýmettik qamqorlyq» jańa áleýmettik sharalaryn iske asyrý boiynsha aqparattyq-túsindirý jumystaryn júrgizý úshin Atyraý oblysyna bardy.
Jumys sapary barysynda Memleket basshysynyń «Nur Otan» partiiasynyń XVIII sezinde alǵa qoiǵan tapsyrmalaryn jáne halyqtyń az qamtylǵan toptaryn qoldaý jáne tabysty arttyrýǵa, kiristeri tómen azamattardyń turǵyn úi máselelerin sheshýge, bilim berý jáne densaýlyq saqtaý salalaryn jaqsartýǵa, óńirlerdi keshendi damytýǵa baǵyttalǵan tapsyrmalaryn iske asyrýdyń negizgi baǵyttary túsindiriledi.
Top quramyna eńbek jáne halyqty áleýmettik qorǵaý ministri B. Saparbaev, bilim jáne ǵylym ministri K. Shámshidinova, densaýlyq saqtaý ministri E. Birtanov, Qurylys jáne turǵyn úi-kommýnaldyq sharýashylyq isteri komitetiniń tóraǵasy M. Jaiymbetov, Orman sharýashylyǵy jáne janýarlar dúniesi komitetiniń tóraǵasy Q. Ryskeldinov, jýrnalister men blogerler kirdi.
G. Ábdiqalyqova Atyraý qalasynda Qurmanǵazy atyndaǵy Mádeniet úiide ótken halyqpen kezdesýde qazaqstandyqtardyń ómir sapasyn jaqsartýǵa: múmkindikteri shekteýli balalardy tárbielep otyrǵan, az qamtylǵan, kópbalaly otbasylardyń, sondai-aq halyqtyń memlekettiń qoldaýyna muqtaj áleýmettik osal toptarynyń ál-aýqatyn arttyrýǵa baǵyttalǵan Elbasynyń «Áleýmettik qamqorlyq» jańa áleýmettik sharalaryna toqtalyp ótti.
Kezdesý qorytyndysy boiynsha bilim jáne ǵylym ministri K. Shámshidinova, densaýlyq saqtaý ministri E. Birtanov bastaǵan shaǵyn toptar Mahambet jáne Maqat aýdandaryna baryp, azamattardy jeke qabyldaý, densaýlyq saqtaý, bilim berý júieleriniń qyzmetkerlerimen kezdesýler ótkizip, densaýlyq saqtaý jáne bilim berý nysandaryn aralady.
Osy kúni Premer-Ministrdiń orynbasary áleýmettik sala qyzmetkerlerine arnalǵan turǵyn úi kesheni qurylysymen tanysty. 72 páterden turatyn birinshi blokty 2019 jylǵy naýryzda paidalanýǵa berý kózdelgen. Shildede turǵyn úi kesheniniń qurylysy tolyqtai aiaqtalady.
Budan ózge, G. Ábdiqalyqova qalalyq Jumyspen qamtý ortalyǵy men Halyqqa qyzmet kórsetý ortalyǵynyń daiyndyǵyn tekserip, Stýdentter úiine bardy. Onda az qamtylǵan otbasylardan shyqqan jastarmen ózekti máselelerdi, sondai-aq, Jastar jyly aiasynda oryndalyp jatqan is-sharalardy júzege asyrý barysyn talqylady.
Jumystyń birinshi kúniniń sońynda aýdandardyń ákimderimen, kásiporyndardyń jáne kásipodaqtyq uiymdardyń basshylarymen keńes ótkizildi, onda jumysshylardyń eńbek aqysyn ýaqytyly jáne laiyqty alýyna qatysty quqyqtaryn qorǵaý, óndiristi jańǵyrtý, jumysshylardyń eńbek jaǵdailarynyń qaýipsizdigin qamtamasyz etý máseleleri talqylandy. Jumys berýshilerdiń, eń aldymen, jumysshylardyń áleýmettik osal sanatyna qatysty áleýmettik jaýapkershiligine erekshe kóńil bólindi. Atyraý oblysyna jumys sapary jalǵasýda.
