QR Premer-Ministriniń birinshi orynbasary Roman Skliar tártipsizdikter saldarynan keltirilgen zalaldy óteý jáne qalpyna keltirý máseleleriniń barysymen tanysý maqsatynda Almaty qalasy men Almaty oblysyna jumys saparymen bardy. Bul týraly primeminister.kz saity habarlady.
Almaty qalasynyń ákimi Baqytjan Saǵyntaev búgingi tańda qalada kólik qatynasy men azyq-túlik kásiporyndary shtattyq rejimde jumys istep turǵanyn, jol infraqurylymyn qalpyna keltirý boiynsha qarqyndy jumystar júrgizilip jatqanyn habarlady.
27 qalalyq ǵimaratty jóndeý-qalpyna keltirý jumystaryn júrgizý qajet, onyń ishinde 10 memlekettik jáne jeke menshik múlik nysandary biýdjet qarajaty esebinen qaita jańartylatyn bolady. Qalǵan 17 nysanǵa keltirilgen zalal úlken emes, olar biznestiń áleýmettik jaýapkershiligi aiasynda qalpyna keltiriledi. Qalada 20 qurylys kompaniiasynyń kúshimen 9 nysandy tazalaý jumystary júrgizildi, 800-ge jýyq adam jáne 40 birlikten astam arnaiy tehnika tartyldy.
Sondai-aq, beinebaqylaý kameralaryn qalpyna keltirý jumystary júrgizilýde. Qazirgi ýaqytta búlingen 587 beinebaqylaý kamerasynyń 434-i qalpyna keltirildi. Barlyq beinebaqylaý kameralaryn qalpyna keltirý jumystary 21 qańtarda aiaqtalady.
Sonymen qatar Open Almaty Qoǵamdyq qabyldaýy bazasynda tártipsizdikterden zardap shekken ShOB ókilderine keltirilgen zalaldy óteý máseleleri boiynsha jedel jeli quryldy.
Taldyqorǵan qalasynda Komissiia Almaty oblysynyń ákimi Q. Bozymbaevpen birge 2 mádeniet nysanyn jóndeý jumystarynyń aiaqtalýyn tekserdi. Memlekettik organdardyń 5 ǵimaratyn qalpyna keltirý bastaldy. Jumysqa 400-den astam adam jáne 14 birlik tehnika tartyldy.
«Atameken» UKP málimeti boiynsha óńirde 141 kommertsiialyq nysan zardap shekken. 120-dan astam ShOB uiymdary qalpyna keltirý jumystaryn aiaqtap, ózderiniń negizgi qyzmetine kiristi. Almaty oblysy boiynsha keltirilgen zalaldyń jalpy somasy 16,1 mlrd teńgeni qurady.
R. Skliar óńirlerdi qalpyna keltirý jáne olardyń tynys-tirshiligin jaqsartý boiynsha qarqyndy jumysty jalǵastyrýdy tapsyrdy.
