QR Premer-Ministri Asqar Maminniń áleýmettik jelidegi paraqshasy jalǵan bolyp shyqty. Bul týraly QR Premer-Ministriniń baspasóz qyzmeti habarlady.
"Osy málimdeme arqyly instagram áleýmettik jelisindegi mamin_online akkaýnty jalǵan ekenin habarlaimyz. Tirkeýlik jazbanyń qoldanylýyn toqtatý boiynsha sáikes sharalar qabyldandy", - delingen habarlamada.
Baspasóz ókilderi Instagram áleýmettik jelisiniń qoldanýshylarynan tek QR Premer-Ministriniń Primeminister.kz resmi saitynda jáne Feisbýk, VKontakte, Tvitter, Periskop jáne Odnoklassniki áleýmettik jelilerinde, Iýtýb resmi arnasynda naqtylanǵan akkaýnttarynda ornalastyrylǵan aqparatty paidalanýlaryn suraidy.
Aita ketsek, jaqynda Instagram áleýmettik jelisinde mamin_online atty jańa akkaýnt ashylǵan bolatyn. Bul paraqsha QR Prezidenti Qasym-Jomart Toqaevtyń Instagram jelisine qosylýynan keiin paida boldy.
