Qazaqstan Úkimeti zeinet jasyn tómendetý máselesi qarastyrylyp jatqan joq. Bul týraly QR Eńbek jáne halyqty áleýmettik qorǵaý ministri Birjan Nurymbetov málim etti, dep habarlaidy QazAqparat.
Ortalyq kommýnikatsiialar qyzmetindegi baspasóz máslihatynda jaqynda depýtattar zeinet jasyn tómendetý týraly usynys jasaǵany, jalpy zeinetkerlikke shyǵý jasynda qandai kriteriiler eskerilgeni suraldy.
«Zeinet jasyn tómendetý týraly usynystar kelip jatyr. Jalpy, zeinet jasyn ulǵaitý men tómendetý máselesi bir mezette sheshilmeidi. Kez kelgen elde, álemde bul máselege qatysty sheshim qabyldanǵanda – ol úlken zertteýlerge, uzaq merzimdi boljamdarǵa súienip jasalady. Bul turǵyda ekonomikalyq, demografiialyq faktorlar eskeriledi. Jumys istep júrgen azamattar men zeinetkerlerdiń sanynyń arasyndaǵy araqatynas mólsheri, halyqtyń qartaiý qarqyny, sondai-aq basqa da kórsetkishter eskeriledi», - dedi ministr.
Osy oraida ol elimizde zeinetaqynyń úsh júiesi qalyptasqanyn eske saldy. Memleket tarapynan eki túri tólenedi, iaǵni jasyna bailanysty zeinetaqy men bazalalyq zeinetqy bar. Sonymen qatar jinaqtaýshy qordan jinalǵan qarjy esebinen zeinetaqy qamtylǵan.
«Kez kelgen zeinetaqynyń túri eńbek ótiline tikelei bailanysty. Iaǵni neǵurlym eńbek ótili joǵary bolsa, soǵurlym zeinetaqynyń mólsheri de joǵary. Bul turǵyda ekonomikalyq ta, eńbek naryǵynyń máselesin eskerý qajet. Jumys istep júrgen azamattar men zeinetkerlerdiń arasyndaǵy araqatynas mólsherine mán beriledi. Osydan 10 jyl buryn zeinetkerlerimsizdiń sany jumys istep júrgenderge qatysty 20 paiyz bolsa, qazir 30 paiyzdan asyp jatyr. Ekinshiden, 65 jastan asqan aǵa býyn sany kóbeiip jatyr. Álemdegi trendterdi eskere otyryp, búkil dúniejúzindegi elder qaita zeinet jasyn ulǵaitýǵa baryp jatyr. Árine, Eýropada jáne basqa da damyǵan elderde zeinet jasy bizdikinen buryn da joǵary edi. Reseide 2019 jyldan bastap erler men áielderge zeinet jasyn ulǵaitý sharalary iske asyryldy», - dedi B. Nurymbetov.
«Álemdik tájiribeni de eskerip, ózimizdiń ekonomikalyq, demografiialyq jaǵdaiǵa súiene otyryp, qazirgi kezde Úkimettiń tarapynan zeinet jasyn tómendetý máselesi qarastyrylyp jatqan joq», - dedi vedomstvo basshysy.
