Úkimette Premer-Ministrdiń birinshi orynbasary Álihan Smaiylovtyń tóraǵalyǵymen elimizde 2021 jyly ulttyq halyq sanaǵyn ótkizýge daiyndyq jáne uiymdastyrý máselelerin sheshý boiynsha arnaiy komissiianyń otyrysy ótti. Bul týraly primeminister.kz saity habarlady.
Premer-Ministrdiń birinshi orynbasary sanaq quramyn tolyq qamtamasyz etý jáne vaktsinalaý máselelerine basa nazar aýdarýdy tapsyrdy.
Tiisti memlekettik organdar men ákimdikterge eriktiler uiymdaryn, stýdentter men jumyssyz turǵyndardy suhbattasýshy retinde tartý boiynsha jumysty kúsheitý tapsyryldy.
Sanaq júrgizilip jatqan kezde personaldyń qaýipsizdigin qamtamasyz etý, sondai-aq josyqsyz adamdardyń alaiaqtyq áreketterin toqtatý eskertildi.
Á.Smaiylov óńirlerdiń basshylaryna buqaralyq aqparat quraldaryndaǵy bannerler men bilbordtardy, jaryq diodty ekrandardy, únparaqtardy, tiisti aqparattyq habarlamalardy ǵana emes, sonymen qatar habarlaý quraly retinde turǵyn úilerdiń toptyq chattaryn da qarastyrý arqyly halyq arasynda aqparattyq-túsindirý jumystaryn kúsheitýdi tapsyrdy.
Sanaq naýqany aiaqtalǵanǵa deiin eldi mekenderdiń quramdas bólikteriniń ataýlaryn ózgertýge moratoriidi saqtaý máselesi de qaita kóterildi.
Sondai-aq, áńgime memlekettik organdardyń biryńǵai kólik ortasy sheńberinde, shalǵai aýdandar men aýyldarda joǵary sapaly Internetke qosylýdy qamtamasyz etý úshin «egov.kz» veb-portaly men «sanaq.gov.kz» saityn integratsiialaý aiasynda atqarylǵan jumystar boiynsha aqparattyq resýrstarǵa qoljetimdilikti qamtamasyz etý týraly boldy.
Qorytyndylai kele, Á. Smaiylov jeke tulǵalardyń qupiia aqparatyn saqtaýdyń mańyzdylyǵyn taǵy bir atap ótti jáne mundai málimetter «Memlekettik statistika týraly» QR Zańymen qorǵalatynyn eske saldy.
Esterińizge sala keteiik, 2021 jylǵy Ulttyq halyq sanaǵy 1 qyrkúiekten 15 qazanǵa deiin sanaq.gov.kz mamandandyrylǵan veb-saitynda onlain formatta josparlanǵan, al sanaqtan onlain ótpegen azamattar úshin qajetti sanitarlyq normalardy saqtai otyryp, ádettegidei úi-úidi aralaý 1-30 qazan aralyǵynda uiymdastyrylady.
