Úkimette Premer-Ministrdiń birinshi orynbasary Álihan Smaiylovtyń tóraǵalyǵymen «Nur Otan» partiiasynyń «Ózgerister joly: ár azamatqa laiyqty ómir!» Sailaýaldy baǵdarlamasyn iske asyrý jónindegi shtabtyń kezekti otyrysy ótti, dep habarlaidy "Ult aqparat" primeminister.kz-ke silteme jasap.
Otyrystyń kún tártibinde JOO túlekteriniń jumysqa ornalasýy, jańa mektepter salý jáne biznesti qoldaý máseleleri qaraldy. 2025 jylǵa qarai elimizde 800 jańa mektep salynady, shaǵyn qalalardaǵy, oblys ortalyqtary men aýyldardaǵy taǵy 5000 mektep jańartylady. Barlyq aýyl mektepteri jyldamdyǵy joǵary internetpen qamtamasyz etiledi.
Premer-Ministrdiń birinshi orynbasary Á. Smaiylov apatty jáne úsh aýysymdy mektepter problemalaryn joiý úshin barlyq mehanizmderdi qoldaný qajet ekendigine nazar aýdardy. Atap aitqanda, MJÁ tetigi, jekemenshik mektepter ashý, memlekettik biýdjet jáne Jumyspen qamtýdyń jol kartasy esebinen nysanaly qurylys salý usynylady. Osy tarmaqtar boiynsha Bilim jáne ǵylym ministrligine nusqaý berildi.
Jumys tájiribesi joq ýniversitet túlekterin jumysqa ornalastyrý máseleleri de shtabtyń basty nazarynda. Eńbek jáne halyqty áleýmettik qorǵaý ministrligi «Alǵashqy jumys orny» jobasyn iske qosady, jylyna orta eseppen 5000 adam qamtylmaq.
Á. Smaiylov bul tarmaqtardyń mańyzdylyǵyn atap ótip, qazirgi kezde jas mamandardyń ýniversitetti nemese kolledjdi bitirgennen keiin birden jumys taba almaitynyn, jumys berýshilerdiń jumys tájiribesi bar kadrlarǵa basymdyq beretinin basa aitty. Eńbek jáne halyqty áleýmettik qorǵaý ministrligi NEET sanatyndaǵy jastar men jumyssyz jastardyń statistikasyn usyndy.
Vitse-premer jergilikti atqarýshy organdarǵa jumyssyz jastardy jumyspen qamtý máselesin odan ári sheshý úshin olardyń sanyna taldaý usynýdy, sondai-aq osy tarmaqty iske asyrý úshin jergilikti biýdjetten qarajat bólýdi qamtamasyz etýdi tapsyrdy.
Sondai-aq, shtabta jas kásipkerler úshin jańa biznes-ideialardy yntalandyrý máselesi qaraldy. Atap aitqanda, shtab bul biznesti qoldaýdyń tiimdi quraldarynyń biri ekenine senimdi. Tek 2020 jyldyń ózinde 45 myń grant bólindi, onyń ishinde 11 myń grantty jas kásipkerler aldy. 2025 jylǵa deiin jyl saiyn 10 myń grant bólinedi dep shamalanýda.
Á. Smaiylov sapaly bilim berý infraqurylymyn damytý halyqty jumyspen qamtylýyn qoldaý siiaqty mańyzdy másele ekenin atap aitty.
Sonymen qatar Premer-Ministrdiń birinshi orynbasary partiianyń sailaýaldy baǵdarlamasynyń ýaqtyly jáne sapaly oryndalýyn qamtamasyz etý úshin barlyq deńgeidegi atqarýshy organdardyń úilesimdi ózara árekettestigi qajet ekenin atap ótti. Osyndai ózara árekettestikti uiymdastyrýdyń eń tiimdi ádisi - jobany basqarý. Osyǵan bailanysty QR Úkimeti ulttyq jobalardyń iske asyrylýyna monitoring júrgizý úshin arnaiy keńse qurdy.
