Foto: Úkimet
Úkimette Premer-ministrdiń orynbasary – mádeniet jáne aqparat ministri Aida Balaevanyń tóraǵalyǵymen juqpaly aýrýlardyń taralýyna qatysty keńes ótti. Onda qyzylshanyń taralý máselesi jeke qaraldy, dep habarlaidy Ult.kz.
Densaýlyq saqtaý ministrliginiń málimetinshe, ótken jylda qyzylshaǵa shaldyǵý deńgeii 2024 jylmen salystyrǵanda 85%-ǵa tómendegen. Sonymen qatar jyl basynan beri el aýmaǵynda qyzylshanyń 1 951 jaǵdaiy tirkelgen. Aýrýshańdyqtyń eń joǵary kórsetkishteri Astana men Almaty qalalarynda, sondai-aq Jambyl jáne Atyraý oblystarynda baiqalady. Atalǵan jaǵdailardyń basym bóligi 5 jasqa deiingi balalar arasynda tirkelgen. Aýrýǵa shaldyqqandardyń kópshiligi – vaktsina almaǵan balalar. Onyń ishinde ekpeden bas tartý sebepti egilmegender de bar ekeni atap ótildi.
Keńes barysynda qyzylsha boiynsha syrqattanýshylyq deńgeii joǵary óńirlerdiń ákim orynbasarlarynyń baiandamalary tyńdaldy.
Premer-ministrdiń orynbasary óńirlik shtabtar deńgeiinde qyzylsha boiynsha epidemiologiialyq ahýaldy kún saiyn taldap otyrýdyń mańyzdylyǵyn atap ótip, jergilikti jerlerdegi basshylardyń jeke jaýapkershiligine erekshe nazar aýdardy.
Sondai-aq profilaktikalyq ekpemen qamtý máselesi jeke qaraldy. Birqatar óńirlerde josparly kórsetkishterge qol jetkizilmegeni aityldy. Ásirese Mańǵystaý oblysynda negizgi vaktsinalardyń barlyq túri boiynsha qamtý deńgeii tómen kúiinde qalyp otyr. Mundai alshaqtyqtar infektsiialyq aýrýlardyń taralý qaýpin kúsheitetindikten, bastapqy meditsinalyq-sanitariialyq kómek deńgeiinde nysanaly jáne júieli jumysty kúsheitý qajettigi atap ótildi.
Keńes qorytyndysy boiynsha Aida Balaeva qyzylshaǵa qatysty epidemiologiialyq ahýaldy erekshe baqylaýǵa alýdy, sondai-aq halyq arasynda immýndaýdyń mańyzdylyǵy jónindegi aqparattyq-túsindirý jumystaryn jandandyrýdy tapsyrdy. Bul baǵyttaǵy jumysty, eń aldymen, Mańǵystaý oblysynda kúsheitý qajet ekeni aityldy.
