فوتو: ٷكٸمەت
ٷكٸمەتتە پرەمەر-مينيستردٸڭ ورىنباسارى – مەدەنيەت جەنە اقپارات مينيسترٸ ايدا بالاەۆانىڭ تٶراعالىعىمەن جۇقپالى اۋرۋلاردىڭ تارالۋىنا قاتىستى كەڭەس ٶتتٸ. وندا قىزىلشانىڭ تارالۋ مەسەلەسٸ جەكە قارالدى, دەپ حابارلايدى Ult.kz.
دەنساۋلىق ساقتاۋ مينيسترلٸگٸنٸڭ مەلٸمەتٸنشە, ٶتكەن جىلدا قىزىلشاعا شالدىعۋ دەڭگەيٸ 2024 جىلمەن سالىستىرعاندا 85%-عا تٶمەندەگەن. سونىمەن قاتار جىل باسىنان بەرٸ ەل اۋماعىندا قىزىلشانىڭ 1 951 جاعدايى تٸركەلگەن. اۋرۋشاڭدىقتىڭ ەڭ جوعارى كٶرسەتكٸشتەرٸ استانا مەن الماتى قالالارىندا, سونداي-اق جامبىل جەنە اتىراۋ وبلىستارىندا بايقالادى. اتالعان جاعدايلاردىڭ باسىم بٶلٸگٸ 5 جاسقا دەيٸنگٸ بالالار اراسىندا تٸركەلگەن. اۋرۋعا شالدىققانداردىڭ كٶپشٸلٸگٸ – ۆاكتسينا الماعان بالالار. ونىڭ ٸشٸندە ەكپەدەن باس تارتۋ سەبەپتٸ ەگٸلمەگەندەر دە بار ەكەنٸ اتاپ ٶتٸلدٸ.
كەڭەس بارىسىندا قىزىلشا بويىنشا سىرقاتتانۋشىلىق دەڭگەيٸ جوعارى ٶڭٸرلەردٸڭ ەكٸم ورىنباسارلارىنىڭ باياندامالارى تىڭدالدى.
پرەمەر-مينيستردٸڭ ورىنباسارى ٶڭٸرلٸك شتابتار دەڭگەيٸندە قىزىلشا بويىنشا ەپيدەميولوگييالىق احۋالدى كٷن سايىن تالداپ وتىرۋدىڭ ماڭىزدىلىعىن اتاپ ٶتٸپ, جەرگٸلٸكتٸ جەرلەردەگٸ باسشىلاردىڭ جەكە جاۋاپكەرشٸلٸگٸنە ەرەكشە نازار اۋداردى.
سونداي-اق پروفيلاكتيكالىق ەكپەمەن قامتۋ مەسەلەسٸ جەكە قارالدى. بٸرقاتار ٶڭٸرلەردە جوسپارلى كٶرسەتكٸشتەرگە قول جەتكٸزٸلمەگەنٸ ايتىلدى. ەسٸرەسە ماڭعىستاۋ وبلىسىندا نەگٸزگٸ ۆاكتسينالاردىڭ بارلىق تٷرٸ بويىنشا قامتۋ دەڭگەيٸ تٶمەن كٷيٸندە قالىپ وتىر. مۇنداي الشاقتىقتار ينفەكتسييالىق اۋرۋلاردىڭ تارالۋ قاۋپٸن كٷشەيتەتٸندٸكتەن, باستاپقى مەديتسينالىق-سانيتارييالىق كٶمەك دەڭگەيٸندە نىسانالى جەنە جٷيەلٸ جۇمىستى كٷشەيتۋ قاجەتتٸگٸ اتاپ ٶتٸلدٸ.
كەڭەس قورىتىندىسى بويىنشا ايدا بالاەۆا قىزىلشاعا قاتىستى ەپيدەميولوگييالىق احۋالدى ەرەكشە باقىلاۋعا الۋدى, سونداي-اق حالىق اراسىندا يممۋنداۋدىڭ ماڭىزدىلىعى جٶنٸندەگٸ اقپاراتتىق-تٷسٸندٸرۋ جۇمىستارىن جانداندىرۋدى تاپسىردى. بۇل باعىتتاعى جۇمىستى, ەڭ الدىمەن, ماڭعىستاۋ وبلىسىندا كٷشەيتۋ قاجەت ەكەنٸ ايتىلدى.
