Úkimette QR Premer-Ministri Álihan Smaiylovtyń tóraǵalyǵymen «Qazaqstan Respýblikasy azamattarynyń tólem qabilettiligin qalpyna keltirý jáne bankrottyǵy týraly» zań jobasy talqylandy, dep habarlaidy "Ult aqparat" primeminister.kz saityna silteme jasap.
Qarjy ministrligi «Azamattardyń tólem qabilettiligin qalpyna keltirý jáne bankrottyǵy týraly» Qazaqstan Respýblikasy zańynyń jobasy jáne oǵan ilespe zań jobalary boiynsha jumysty aiaqtady. 21 zańnamalyq aktige (8 kodeks pen 13 zańǵa) ózgerister men tolyqtyrýlar engizý kózdelip otyr.
Tiisti zań jobasy azamattardyń borysh júktemesin azaitý, áleýmettik shielenisti jeńildetý, qaryzdar boiynsha tólemderdi yntalandyrý jáne boryshkerlerdi ónimdi ekonomikalyq qyzmetke qaitarýdy qamtamasyz etý maqsatynda ázirlendi.
Zań jobalaryn talqylaý barysynda jumys tobynyń 10 otyrysy ótti, 100-den astam usynys pen eskertýler qaraldy, «elektrondyq úkimet» platformasy arqyly qoiylǵan 276 suraqqa jaýap berildi.
Usynystar negizinde zań jobalaryna ózgerister engizildi, onyń ishinde: bankrottyq týraly ótinishterdi berý rásimi jeńildetildi, áleýmettik jaǵynan az qamtylǵan adamdarǵa memlekettik kómek qarastyryldy, bitimgershilik kelisim jasasý múmkindigi engizildi, bankrottardyń qarjylyq saýattylyqty arttyrý kýrstarynan mindetti túrde ótýi jáne taǵy basqasy engizildi.
Keńes qorytyndysy boiynsha QR Premer-Ministri Álihan Smaiylov ýákiletti memlekettik organdarǵa kelisilmegen máseleler boiynsha biryńǵai ustanymdar ázirleýdi jáne otandyq zańnamada qarastyrylǵan barlyq saraptamalardy júrgizýdi tapsyrdy.
