Búgin Úkimet otyrysynda QR Ulttyq ekonomika ministri Álibek Qýantyrov elimizdiń batys óńirlerin keshendi damytýdyń josparlaryn tanystyrdy, dep habarlaidy QazAqparat.
«Batys óńirlerin – Aqtóbe, Atyraý, Batys Qazaqstan, Mańǵystaý oblystarynyń áleýmettik-ekonomikalyq damytýdyń keshendi josparlarynyń jobalary usynylyp otyr. Memleket basshysynyń tapsyrmasyn oryndaý maqsatynda Aqtóbe jáne Batys Qazaqstan oblystaryn damytýdyń 2022-2025 jyldarǵa arnalǵan jańa keshendi josparlary ázirlendi, sondai-aq qoldanystaǵy Atyraý jáne Mańǵystaý oblystaryn damytýdyń 2021-2025 jyldarǵa arnalǵan keshendi josparlary ózektendirildi», - dedi Qýantyrov.
Onyń aitýynsha, batys óńirlerdi damytýdyń 4 keshendi josparyn qarjylandyrýdyń jalpy kólemi 15,3 trln teńge, onyń ishinde respýblikalyq biýdjetten – 1,7 trln teńge.
«Ministrlik, ortalyq memlekettik organdarmen, ákimdiktermen birlesip, óńirlerdiń áleýmettik-ekonomikalyq damýyna jáne turaqty jumys oryndaryn qurýǵa tikelei jáne janama mýltiplikativtik áserlerdiń joǵary áleýeti bar jobalardy irikteý boiynsha jumys júrgizdi», - dedi ministr.
Atap aitqanda, Aqtóbe oblysynyń keshendi jospary 92 is-sharadan turady. Jospardy iske asyrýdyń jalpy somasy 1,7 trln teńge, onyń ishinde respýblikalyq biýdjet – 343,3 mlrd teńge, jergilikti biýdjet - 165,6 mlrd teńge, jeke investitsiialar - 1,2 trln teńge.
Al Batys Qazaqstan oblysyn damytýdyń keshendi jospary jalpy somasy 2,6 trln teńgeni quraityn 116 is-sharany qamtydy. Onyń ishinde respýblikalyq biýdjet – 416,1 mlrd teńge, jergilikti biýjet – 117,8 mlrd teńge, jeke investitsiialar – 2,1 trln teńge.
Atyraý oblysyn damytýdyń ózektendirilgen keshendi jospary jalpy somasy 8,9 trln teńge bolatyn 185 is-sharadan turady. Onyń ishinde respýblikalyq biýdjet – 535,8 mlrd teńge, jergilikti biýdjet – 112,6 mlrd teńge, jeke investitsiialar – 8,3 trln teńge teńge.
Mańǵystaý oblysyn damytýdyń ózektilendirilgen keshendi jospary jalpy qarjylandyrý kólemi 2,1 trln teńgeni quraityn 226 is-sharadan turady. Onyń ishinde respýblikalyq biýdjet – 375,2 mlrd teńge, jergilikti biýdjet – 117,9 mlrd teńge, jeke investitsiialar - 1,6 trln teńge.
