QR Premer-ministri Álihan Smaiylovtyń tóraǵalyǵymen ótken Úkimet otyrysynda agroónerkásip kesheninde sý resýrstaryn paidalaný jónindegi mindetter qaraldy, dep habarlaidy «Ult aqparat» QR Premer-ministriniń baspasóz qyzmetine silteme jasap.
Ekologiia, geologiia jáne tabiǵi resýrstar ministri Serikqali Brekeshevtiń baiandaýynsha, osy jyly barlyq tartylǵan sýdyń shamamen 11,6 km3 turaqty sýarýǵa jiberildi, onyń 97%-y ońtústiktegi bes oblysqa – Almaty, Jambyl, Túrkistan, Qyzylorda jáne Jetisý oblystaryna tiesili, jalpy sýarý aýdany 1,61 mln ga (el boiynsha 73%) boldy.
Atalǵan kezeńde transshekaralyq ózender basseinderindegi 5 322 sý shyǵarý qurylystaryna jóndeý júrgizildi, 1 512 km magistraldyq jáne sharýashylyqaralyq kanaldardy rekonstrýktsiialaý jáne mehanikalyq tazartý júzege asyryldy, sýarý úshin kollektorlyq-drenajdy sýlardy qaita paidalaný úshin 67 sorǵy qondyrǵysy satyp alyndy, 107 myń ga aýdanda sý únemdeý tehnologiialary qoldanyldy.
Búgingi tańda 2023 jylǵy vegetatsiialyq kezeńge daiyndyq úshin arnaiy jospar bekitildi, onyń aiasynda aldyn ala jumystar bastaldy.
Sonymen qatar aýyl sharýashylyǵy ministri Erbol Qarashókeev, Qyzylorda oblysynyń ákimi Nurlybek Nálibaev, Jambyl oblysynyń ákimi Nurjan Nurjigitov jáne Túrkistan oblysynyń ákimi Darhan Satybaldy baiandama jasady.
Premer-Ministr elimizdiń azyq-túlik qaýipsizdigi aýyl sharýashylyǵyna qajetti sýdyń jetkilikti bolýyna tikelei bailanysty ekenin aityp ótti. Sebebi búginde tutynatyn sýdyń jartysynan kóbi agrarlyq sektorǵa tiesili.
Oǵan qosa, AÓK-ti sýmen qamtamasyz etý sý jetispeýshiligine bailanysty jyl ótken saiyn qiyndai túsýde. Álihan Smaiylovtyń aitýynsha, buǵan birneshe faktor áser etip otyr: kórshi elderdiń aýmaǵynan keletin sýǵa táýeldimiz, bizdiń óńirde sýdyń az jinalýy, kanaldardaǵy sýdyń shyǵyny joǵary, sondai-aq sýdy únemdeý tehnologiialary jetkiliksiz.
«Osyǵan qaramastan qabyldanǵan sharalardyń nátijesinde biylǵy vegetatsiialyq kezeń qalypty jaǵdaida ótti. Kórshi memleketterdiń sý qoimalarynan qosymsha sý jiberildi. Sýmen qamtamasyz etý obektilerinde qajetti tehnikalyq jumystar júrgizildi. Bul jumysty ári qarai jalǵastyryp, kelesi vegetatsiialyq kezeńge arnalǵan josparlardy bekitýdiń mańyzy zor», — dedi Álihan Smaiylov.
Premer-Ministr transshekaralyq sýlar boiynsha úkimetaralyq kelisimderdi jetildirý jumystaryn turaqty túrde júrgizý, kanaldar men sý qoimalaryn jóndeý jáne qalpyna keltirý jumystaryn kúsheitý, sýarmaly jerlerde sý únemdeý tehnologiialaryn jáne jalpy sýdy tsifrlyq esepke alýdy engizýdi yntalandyrý kerek ekenin aitty.
«Atap aitqanda, sýdy kóp qajet etetin daqyldardy ósirý úshin jańbyrlatyp jáne tamshylatyp sýarý jabdyqtaryn qoldaný tájiribesin keńeitý qajet. Sondai-aq kollektorlyq-drenajdyq júieler arqyly sýdy qaita paidalaný tehnologiialaryn kóbirek qoldaný kerek», — dedi Álihan Smaiylov.
Sóz sońynda Úkimet basshysy jalpy óńirlerdi qajetti sýdyń kólemimen qamtamasyz etý úshin sýmen jabdyqtaýshy uiymdardyń jumysyn úilestirý qajet ekenin atap ótti.
