QR Premer-Ministri Asqar Maminniń tóraǵalyǵymen ótken Úkimet otyrysynda 2019 jylǵa arnalǵan respýblikalyq biýdjet naqtylandy, dep habarlaidy "Ult aqparat".
Ulttyq ekonomika ministri R. Dálenov negizgi makrokórsetkishter jáne biýdjet parametrleriniń boljamy týraly baiandady, al qarjy ministriniń birinshi orynbasary B. Sholpanqulov 2019 jylǵa arnalǵan naqtylanǵan respýblikalyq biýdjettiń jobasymen tanystyrdy.
Osy jyldyń naýryz aiynda túzetilgen elimizdiń 2019 jylǵa arnalǵan áleýmettik-ekonomikalyq damý boljamynyń negizgi kórsetkishteriniń saqtalýyn eskere otyryp, 2019 jylǵa arnalǵan respýblikalyq biýdjetke naqtylanǵan kirister 7081,3 mlrd teńgeni, shyǵyndar – 12028,1 mlrd teńgeni quraidy.
«Túzetilgen biýdjet kiristeri men shyǵystary áleýmettik mindetterdi sheshý úshin qosymsha qarjylandyrý qajettiligin jabýǵa, ekonomikalyq ósýdiń qosymsha kózderin qurýǵa múmkindik beredi», — dedi A. Mamin.
Ekonomikalyq ósýdiń qosymsha kózderin óńdeý ónerkásibin qoldaýǵa arnalǵan qarajatty qaita bólý, salymshylarǵa turǵyn úi qaryzdaryn berý úshin «Qazaqstannyń Turǵyn úi qurylys jinaq banki» AQ nesielendirý, Pavlodar jáne Aqtóbe oblystarynyń suranysqa ie sýarmaly jerleriniń gidromeliorativti júielerin rekonstrýktsiialaý, sondai-aq Jambyl oblysynda aýylda kooperatsiiany damytýdyń pilottyq jobasyn júzege asyrý arqyly qurý josparlanǵan.
Osy mindetterdi 199,1 mlrd teńge somasynda shyǵystardy qaita bólý jáne osy jyldyń 9 aiynyń qorytyndysy boiynsha biýdjet kiristerin 94,9 mlrd teńge mólsherinde túzetý jolymen qarjylyq qoldaý usynylady.
Máseleni qaraý qorytyndysy boiynsha QR Premer-Ministri A. Mamin tiisti memlekettik organdarǵa belgilengen tártipte «2019-2021 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister engizý týraly» zań jobasyn QR Parlamentiniń qaraýyna engizýdi tapsyrdy.
