Foto: Ukimet
Premer-ministr Oljas Bektenovtiń tóraǵalyǵymen ótken Úkimet otyrysynda salyq reformasy máselesi qaraldy. Oljas Bektenov osy aptada óńirlerde kásipkerlerdiń, máslihat depýtattary men sarapshylardyń qatysýymen talqylaýdy jalǵastyrý kerek dep tapsyrdy. Bul týraly Ult.kz habarlaidy.
Talqylaý qorytyndysy boiynsha Salyq kodeksiniń jobasyna túzetýler 20 aqpanǵa deiin Májilistiń qaraýyna engiziledi.
«Memleket basshysy otandyq biznes ókilderimen kezdesýde salyq reformasyn kásipkerlermen, depýtattarmen jáne sarapshylarmen birge egjei-tegjeili talqylaýdy tapsyrdy», — dedi Oljas Bektenov.
Júrgizilip jatqan jumystar týraly Premer-ministrdiń orynbasary – ulttyq ekonomika ministri Serik Jumanǵarin baiandady. Máselen, biylǵy 10 aqpanda «Atameken» palatasymen jáne kásipkerlermen saralanǵan mólsherlemeler, arnaiy salyq rejimderi, QQS boiynsha esepke qoiý shegi máseleleri talqylandy.
Serik Jumanǵarin QQS mólsherlemesin salalar boiynsha saralaýmen 12%-dan 16%-ǵa deiin ulǵaitý, arnaýly salyq rejimderin reformalaý, QQS boiynsha mindetti tirkeý esebine qoiý úshin shekti 80 mln teńgeden 15 mln teńgege deiin tómendetý usynylyp otyrǵanyn aitty. Sondai-aq densaýlyq saqtaý salasy úshin 10% tómendetilgen mólsherleme usynylady.
Aýyl sharýashylyǵy taýaryn óndirýshi zańdy tulǵalar biýdjetke tóleýge tiisti QQS-nyń 30%-yn tóleitin. Endi olar tólemeitin bolady.
«Jalpy usynystardy qoldaimyz. Osy aptada óńirlerge baryp, halyqtyń barlyq sanattarymen egjei-tegjeili talqylaý kerek. Men de Astanada jáne óńirlerge baryp, talqylaýlar ótkizemin. Osy jumystyń nátijesi boiynsha Salyq kodeksiniń jobasy men ilespe zań jobasyna túzetýlerdi 20 aqpanǵa deiin Májiliske engizý kerek. Ary qarai Májiliste talqylaýdy jalǵastyramyz», — dep atap ótti Oljas Bektenov.
Búginnen bastap óńirlerdegi biznes-qoǵamdastyqpen Úkimettiń bastamalaryn talqylaityn alty jumys tobynyń jumysy bastalady. Qazirgi ýaqytta toptar óńirlerge shyǵyp, jergilikti jerlerde biznespen kezdesýler ótkizýde.
Aita keteiik, Prezident otandyq biznes ókilderimen kezdesýde Úkimetke qosymsha qun salyǵy máselesin taǵy da pysyqtaýdy tapsyrǵan edi.
