Qazaqstanda mektep oqýshylarynyń amandasý ádebine qatysty ádistemelik usynymdar ázirlenedi. Bul jumysty Oqý-aǵartý ministrligi qolǵa aldy, dep habarlaidy ult.kz.
Oqý-aǵartý ministri Juldyz Súleimenova depýtat Erlan Sairovtyń saýalyna bergen jaýabynda Y. Altynsarin atyndaǵy Ulttyq bilim akademiiasy arnaiy jumys tobyn qurǵanyn málimdedi. Onyń quramyna ǵalymdar, sarapshylar jáne azamattyq qoǵam ókilderi kirgen.
Jumys toby oqýshylardyń amandasý ádebine qatysty ádistemelik usynymdar daiyndaidy. Qujatty ázirleý kezinde bilim berý úderisine qatysýshylardyń, múddeli taraptar men memlekettik organdardyń usynystary eskeriledi. Sondai-aq jobany depýtattarmen qosymsha talqylaý josparlanǵan.
Ministrliktiń málimetinshe, elimizdiń barlyq bilim berý uiymdarynda «Adal azamat» biryńǵai tárbie baǵdarlamasy júzege asyrylyp jatyr. Baǵdarlama ulttyq jáne jalpyadamzattyq qundylyqtardy dáripteýge, minez-qulyq mádenietin qalyptastyrýǵa, jaýapkershilik pen ózara qurmetti damytýǵa baǵyttalǵan.
Qazir baǵdarlama 20 877 bilim berý uiymynda qoldanylady. Onyń ishinde 12 066 mektepke deiingi uiym, 8 048 mektep jáne 763 kolledj bar.
Ministrlik ókilderi amandasý ádebine qatysty erejeler ulttyq mádeniet pen dástúrdi dáripteýge, úlkendi qurmetteý, sypaiylyq pen ózara syilastyqty qalyptastyrýǵa yqpal etedi dep esepteidi.
Buǵan deiin depýtat Erlan Sairov Qazaqstanda amandasýdyń ustamdy úlgisin qalyptastyryp, ony aldymen mektepterde engizýdi usynǵan edi.
