Premer-Ministr Álihan Smaiylovtyń tóraǵalyǵymen ótken Qazaqstannyń Sý keńesiniń otyrysynda sý salasyn keshendi damytý boiynsha josparlar qaraldy, dep habarlaidy Úkimet basshysynyń baspasóz qyzmeti.
Ekologiia, geologiia jáne tabiǵi resýrstar ministri Serikqali Brekeshev taiaýda Memleket basshysynyń halyqqa Joldaýynda belgilengen mindetterdi oryndaý úshin sý salasyn damytýdyń úsh jyldyq keshendi jospary ázirlenip jatqanyn habarlady.
Onyń aiasynda jańa Sý kodeksin ázirleý bastaldy, transshekaralyq ózender boiynsha kelissózder protsesinde Qazaqstannyń pozitsiiasyn nyǵaitý jáne sý resýrstaryn basqarý júiesin damytýdyń 2023-2030 jyldarǵa arnalǵan tujyrymdamasyn bekitý josparlanyp otyr.
Budan basqa, aýyl sharýashylyǵy óndirýshilerin sý únemdeý tehnologiialaryn paidalanýǵa yntalandyratyn tetikter ázirlenedi, sý sharýashylyǵy infraqurylymyn jańǵyrtý jáne sý qoimalaryn salý jumystary jandanady, magistraldyq jáne sharýashylyqaralyq sýarý kanaldaryn Biryńǵai tsifrlyq esepke alý júiesi damidy.
Sonymen qatar Qazaq sý sharýashylyǵy ǵylymi-zertteý institýtyn kúsheitý jáne ony sý resýrstary problemalary jónindegi salalyq ǵylymi ortalyq retinde belgileý, sondai-aq sý salasynda suranysqa ie mamandardy daiarlaý úshin bazalyq joǵary oqý ornyn aiqyndaý josparda bar.
Premer-Ministr atalǵan tásilderdi qoldap, ár baǵytty sapaly pysyqtaýdyń mańyzyn atap ótti. Sonymen qatar Álihan Smaiylov salany damytýdyń jańa josparyn ázirleýdi jedeldetýdi jáne ony osy jyldyń qarasha aiynda qaraýǵa engizýdi tapsyrdy.
«Sý únemdeýdi yntalandyrýdyń tiimdi tetikterin ázirleý, kezeń-kezeńmen sý qoimalaryn rekonstrýktsiialap, salý qajet. Mindetti túrde sý resýrstaryn basqarýdy tsifrlandyrý jáne avtomattandyrý jónindegi jumysty keńeitý mańyzdy, sebebi bul – osy saladaǵy tiimdilikti arttyrýdyń negizgi ádisteriniń biri», — dedi Álihan Smaiylov.
Otyrysqa qatysýshylar Aqtóbe, Jambyl jáne Túrkistan oblystarynda irrigatsiialyq júielerdi qalpyna keltirý boiynsha EQDB-men birlesken jobalardy iske asyrýdyń ózekti máselelerin qarastyrdy.
