Ótken jyly respýblikalyq biýdjetten bólingen nysanaly transfertterdi 2 qala men 3 oblys ákimdigi igere almady. Bul týraly Úkimet otyrysynda QR Qarjy ministri Erulan Jamaýbaev aitty, dep habarlaidy "Ult aqparat".
«2020 jyly óńirlerge kózdelgen nysanaly transfertter tolyq kólemde bólindi jáne 2,2 trln teńgeni qurady. Aldyn ala derekter boiynsha, jergilikti jerlerde 99,4 paiyzy igerilgen. Atqarylmaǵany – 13 mlrd teńge, onyń ishinde 2 mlrd teńge – únemdeý, 11 mlrd teńge igerilmedi. Eń kóp igerilmeý Nur–Sultan, Almaty qalalarynda, Pavlodar, Aqmola jáne Qyzylorda oblystarynda qalyptasty», - dedi ministr.
Onyń aitýynsha, ótken jyly respýblikalyq biýdjettiń parametrleri eki ret naqtylanǵan bolatyn. Bul rette, biýdjet zańnamasyna sáikes shyǵys bóligi respýblikalyq biýdjettik baǵdarlamalar ákimshileriniń jáne jergilikti atqarýshy organdardyń ótinimderi boiynsha 8 ret túzetildi.
«Degenmen, jyl qorytyndysy boiynsha bizde respýblikalyq deńgeide de, nysanaly transfertter boiynsha jergilikti deńgeide de igerilmeý oryn aldy. Osyǵan bailanysty memlekettik organdardyń tiisti laýazymdy tulǵalaryn jaýapkershilikke tartý máselesin qarastyrý usynylady», - dedi Erulan Jamaýbaev.
